काठमाडौं । नेपाली कांग्रेसको १५औँ महाधिवेशन आजदेखि काठमाडौंमा सुरु हुँदैछ। पाँच दिनसम्म चल्ने महाधिवेशनको आज दिउँसो २ बजे उद्घाटन गर्ने कार्यक्रम रहेको छ। महाधिवेशन असोज २२ गतेसम्म चल्नेछ।
महाधिवेशनमा नेपाली कांग्रेसका नेता डा. शेखर कोइराला सहभागी नहुने भएका छन्। पार्टीमा एकता कायम गर्नुपर्ने भन्दै लामो समयदेखि आफूलाई मझधारमा राख्दै आएका कोइरालाले यसअघि नै आफू महाधिवेशनमा सहभागी नहुने बताउँदै आएका थिए।
कोइरालाले पार्टी एकताका लागि अभियान सञ्चालन गर्ने बताउँदै आएका छन्। उनीनिकट नेताहरू पनि पार्टी एकताको पक्षमा उभिएका छन्। नेता तथा कार्यकर्ताले आफ्नो विवेकका आधारमा निर्णय लिनुपर्ने कोइरालाको भनाइ छ।
‘परम्पराको सम्मान र परिवर्तनको संकल्प : समुन्नत नेपालका लागि सबल कांग्रेसको विकल्प’ भन्ने नारासहित आयोजना हुन लागेको महाधिवेशनले पार्टीको नयाँ नेतृत्व चयन गर्नेछ। साथै, महाधिवेशनले कांग्रेसको आगामी राजनीतिक तथा सांगठनिक रणनीतिसमेत तय गर्नेछ।
