काठमाडौं । जल तथा मौसम विज्ञान विभाग अन्तर्गतको मौसम पूर्वानुमान महाशाखाले हाल नेपालमा पश्चिमी वायु तथा स्थानीय वायुको आंशिक प्रभाव रहेको जनाएको छ।
महाशाखाका अनुसार हाल कोशी प्रदेश, मधेस प्रदेश र लुम्बिनी प्रदेश लगायत देशका पहाडी तथा हिमाली भूभागमा सामान्य बदली रहेको छ भने अन्य स्थानमा आंशिक बदली रहेको छ। साथै, कोशी, गण्डकी प्रदेश र कर्णाली प्रदेश का एक–दुई स्थानमा मेघगर्जन र चट्याङसहित हल्का वर्षा तथा हिमपात भइरहेको छ।
आज दिउँसो कोशी प्रदेशसहित देशका पहाडी तथा हिमाली भेगमा सामान्य बदली रहने र तराई क्षेत्रमा आंशिक बदली रहने अनुमान गरिएको छ। कोशी, बागमती प्रदेश, गण्डकी र कर्णाली प्रदेशका पहाडी तथा हिमाली भूभागका केही स्थान तथा अन्य प्रदेशका एक–दुई स्थानमा मेघगर्जन र चट्याङसहित हल्का वर्षा र हिमपातको सम्भावना रहेको छ। कोशी प्रदेशको तराई क्षेत्रमा पनि एक–दुई स्थानमा वर्षाको सम्भावना रहेको जनाइएको छ।
त्यसैगरी, आज राति देशका हिमाली भूभागमा सामान्य बदली, पहाडी क्षेत्रमा आंशिक बदली तथा तराई क्षेत्रमा मौसम सामान्यतया सफा रहनेछ। कोशी, गण्डकी र कर्णाली प्रदेशका केही स्थानमा मेघगर्जनसहित हल्का वर्षा र हिमपातको सम्भावना रहेको महाशाखाले जनाएको छ।
