काठमाडौं – आकर्षक तलबको प्रलोभन देखाएर विभिन्न देश पठाइदिन्छु भन्दै ठगी गरेको अभियोगमा प्रहरीले ५ जनालाई पक्राउ गरेको छ।
पक्राउ पर्नेहरूमा काठमाडौं, ललितपुर र भक्तपुरका अर्जुन बहादुर पौडेल, डिल्ली राम भुजेल, उमा गुरुङ, आशिष महत र संगिता श्रेष्ठ रहेका छन्। उनीहरूले क्रोएशिया, मालदिभ्स, बेलायत र पोर्चुगल पठाइदिने भन्दै विभिन्न व्यक्तिबाट लाखौँ रुपैयाँ असुलेर सम्पर्कविहीन भएको उजुरीका आधारमा पक्राउ गरिएको हो।
काठमाडौं उपत्यका अपराध अनुसन्धान कार्यालय टेकुबाट खटिएको प्रहरी टोलीले उनीहरूलाई विभिन्न स्थानबाट पक्राउ गरेको जनाएको छ। प्रहरीका अनुसार आशिष महतले मात्र एक जनाबाट २३ लाख रुपैयाँ ठगी गरेका छन् भने अन्यले पनि २ लाखदेखि ३ लाखभन्दा बढी रकम असुलेको पाइएको छ।
पक्राउ परेका सबैलाई थप अनुसन्धान तथा कारबाहीका लागि वैदेशिक रोजगार विभाग ताहाचल पठाइएको प्रहरीले जनाएको छ। प्रहरीले वैदेशिक रोजगारीका नाममा हुने ठगीप्रति सचेत रहन र आधिकारिक माध्यमबाट मात्र प्रक्रिया अघि बढाउन सर्वसाधारणलाई आग्रह गरेको छ।
