विराटनगर । विराटनगर–१ स्थित सनसाइन इंग्लिस बोर्डिङ स्कुलले कक्षा १० मा अध्ययनरत विद्यार्थीहरूलाई औपचारिक रूपमा विदाइ गरेको छ ।
यसपालि एसइई परीक्षा दिने १९ जना विद्यार्थीहरूलाई शुक्रबार स्कुल परिसरमा एक कार्यक्रम आयोजना गर्दै स्कुलले विदाइ गरेको हो । कक्षा ९ का विद्यार्थीहरूले आयोजना गरेको कार्यक्रममा विद्यालय परिवारले एसइई दिने १८औं ब्याचका विद्यार्थीहरूको आगामी शैक्षिक यात्राको सफलताको कामना गरेको थियो ।
कार्यक्रममा विभिन्न सांस्कृतिक प्रस्तुति, नृत्य तथा सन्देशमूलक नाटकमार्फत विद्यार्थीहरूले आफ्ना अनुभव र भावना व्यक्त गरेका थिए । साना कक्षाका विद्यार्थीहरूले पनि आफ्ना अग्रजलाई शुभकामना दिँदै कार्यक्रमलाई थप आकर्षक बनाएका थिए ।
स्कुलका प्रिन्सिपल बद्री रिजालले कक्षा १० का विद्यार्थीहरूलाई आसन्न एसइई परीक्षामा उत्कृष्ट नतिजा हासिल गर्न मेहनत, अनुशासन र आत्मविश्वासका साथ तयारीमा जुट्न सुझाव दिए । उनले विद्यालयले प्रदान गरेको ज्ञान र सीपलाई व्यवहारमा उतार्दै सफल भविष्य निर्माण गर्न आग्रह गरे ।
त्यस्तै, विद्यालयका सहायक प्रिन्सिपल टीका भुजेलले विद्यार्थीहरूलाई समय व्यवस्थापन गर्दै नियमित अध्ययन गर्न र परीक्षा केन्द्रित तयारीमा ध्यान दिन आग्रह गरे । उनले अभिभावक र शिक्षकको सहयोगलाई सही रूपमा उपयोग गर्न पनि सुझाव दिए ।
कार्यक्रममा विद्यालयका अध्यक्ष शिवकुमार खड्का, शिक्षक-शिक्षिका, विद्यार्थी तथा अभिभावकहरूको उपस्थिति रहेको थियो । २०५७ सालमा स्थापित उक्त विद्यालयमा करिब ४०० विद्यार्थी अध्ययनरत छन् । यसअघिका एसइईमा शतप्रतिशत उत्कृष्ट नतिजा ल्याइरहेको स्कुलले यसपालि सर्वोत्कृष्ट रिजल्ट ल्याउने दाबी गरेको छ ।
