अमेरिकाले इरानमाथि गरिएको सैन्य आक्रमणको पहिलो सातामै करिब ११.३ अर्ब डलर खर्च गरेको तथ्य सार्वजनिक भएको छ। अमेरिकी रक्षा मन्त्रालयले सांसदहरूलाई दिएको जानकारीअनुसार यो रकम आक्रमण सुरु भएको ६ दिनभित्रै खर्च गरिएको हो।
फेब्रुअरी २८ देखि सुरु भएको अमेरिका–इजरायल संयुक्त आक्रमणमा प्रयोग भएको यो बजेटमा मध्यपूर्वमा सैनिक तैनाथीजस्ता सम्पूर्ण दीर्घकालीन खर्च भने समावेश गरिएको छैन। युद्ध लम्बिँदै जाँदा खर्च अझै बढ्ने अनुमान गरिएको छ।
यो रकम अमेरिकाका विभिन्न सार्वजनिक स्वास्थ्य तथा वैज्ञानिक निकायहरूको वार्षिक बजेटभन्दा समेत बढी भएको उल्लेख गरिएको छ। उदाहरणका लागि, वातावरण संरक्षण एजेन्सी, रोग नियन्त्रण तथा रोकथाम केन्द्र तथा नेसनल क्यान्सर इन्स्टिच्युटको वार्षिक बजेटभन्दा यो खर्च बढी रहेको बताइएको छ।
विज्ञहरूले यस्तो खर्चले अमेरिकाको प्राथमिकतामाथि गम्भीर प्रश्न उठाएको बताएका छन्। एडम ग्याफ्नी ले यसले जनस्वास्थ्यभन्दा सैन्य खर्चलाई प्राथमिकता दिइएको देखाएको टिप्पणी गरेका छन्।
यसैबीच, डोनाल्ड ट्रम्प प्रशासनले वातावरण र स्वास्थ्यसम्बन्धी निकायहरूको बजेटमा ठूलो कटौती प्रस्ताव गरेको पनि जनाइएको छ।
विश्लेषकहरूका अनुसार, बढ्दो सैन्य खर्चका कारण विज्ञान, अनुसन्धान र जनस्वास्थ्य क्षेत्र प्रभावित हुन सक्ने चिन्ता बढ्दै गएको छ।
