सुर्खेत । वीरेन्द्रनगरस्थित जनजागरण सामुदायिक वनमा मृत भेटिएकी १६ वर्षीया इनिशा विकको पोस्टमार्टम रिपोर्ट सार्वजनिक भएको छ। रिपोर्ट अनुसार बलात्कारपछि अत्यधिक रक्तश्रावका कारण उनको मृत्यु भएको छ।
जिल्ला प्रहरी कार्यालय सुर्खेतका प्रमुख प्रहरी उपरीक्षक सुधीरराज शाहीले पोस्टमार्टम रिपोर्टले बलात्कारपछि मृत्यु भएको देखाएको बताए। तर, सामूहिक बलात्कार भएको हो कि होइन भन्ने विषयमा थप परीक्षण आवश्यक भएकाले प्रहरीले अनुसन्धान प्रक्रिया अघि बढाएको जानकारी दिइएको छ।
फागुन २३ गते बिहान ‘प्रयोगात्मक परीक्षा छ’ भन्दै घरबाट निस्किएकी इनिशा करिब ९ बजेतिर वीरेन्द्रनगर–४ स्थित सहिद पार्क नजिकको जंगलमा बेहोस अवस्थामा भेटिएकी थिइन्। घटनामा संलग्न भएको आशंकामा प्रहरीले वीरेन्द्रनगर–९ का अनमोल गौलीसहित चारजनालाई नियन्त्रणमा लिएर अनुसन्धान जारी राखेको छ।
पीडित परिवारले दोषीलाई कडा कारबाही र न्यायको माग गर्दै प्रदर्शन समेत गरेका छन्।
