विराटनगर । फागुन २१ गते सम्पन्न प्रतिनिधिसभा सदस्य निर्वाचनबाट कोशी प्रदेशमा एक लाख ३० हजार ८४७ मत बदर भएको छ । प्रदेश निर्वाचन कार्यालय विराटनगरले निर्वाचनमा प्रदेशभर उक्त संख्यामा मत बदर भएको जनाएको छ ।
निर्वाचनमा कोशी प्रदेशका १४ जिल्लाका २८ निर्वाचन क्षेत्रबाट २० लाख ८४ हजार २१९ मत खसेको प्रदेश निर्वाचन कार्यालयले जनाएको छ । खसेकोमध्ये १९ लाख ५३ हजार ३७२ मत मात्रै सदर भए । बाँकी मत बदर भएको कार्यालयको तथ्यांक छ ।
ताप्लेजुङमा दुई हजार ६८६, पाँचथरमा तीन हजार ८९७, इलाम क्षेत्र नम्बर १ मा चार हजार ५६६ र क्षेत्र नम्बर २ मा तीन हजार ८९५ मत बदर भएको छ । झापा जिल्लाका विभिन्न निर्वाचन क्षेत्रमा पनि उल्लेखनीय संख्यामा मत बदर भएको छ । झापा–१ मा चार हजार २६९, झापा–२ मा चार हजार ४६९, झापा–३ मा पाँच हजार ६२९, झापा–४ मा चार हजार ७६८ र झापा–५ मा चार हजार २१९ मत बदर भएको प्रदेश निर्वाचन कार्यालयको तथ्यांकमा उल्लेख छ ।
पहाडी जिल्लाहरूमा पनि बदर मतको संख्या कम छैन । संखुवासभामा तीन हजार ७८०, तेह्रथुममा एक हजार ९०९, भोजपुरमा तीन हजार ८७१ र धनकुटामा चार हजार ८८३ मत बदर भएको छ । मतदातालाई मतदान प्रक्रियाका बारेमा पर्याप्त र स्पष्ट जानकारी नहुँदा मत बदर हुने समस्या दोहोरिने गरेको छ ।
मोरङमा बदर मतको संख्या तुलनात्मक रूपमा अझै बढी देखिएको छ । मोरङ–१ मा चार हजार ८३७, मोरङ–२ मा छ हजार ५०, मोरङ–३ मा छ हजार ८२७, मोरङ–४ मा पाँच हजार २५६, मोरङ–५ मा सात हजार ८८९ र मोरङ–६ मा पाँच हजार ६४४ मत बदर भएका छन् । विशेष गरी मोरङ क्षेत्र नं ५ मा सबैभन्दा बढी १० दशमलव ४४ प्रतिशत मत बदर भएको छ । मोरङ–५ को बदर मतको संख्या प्रदेशकै उच्च हो ।
सुनसरीमा बदर मत उल्लेखनीय रहेको छ । सुनसरी–१ मा चार हजार ४८९, सुनसरी–२ मा छ हजार २२९, सुनसरी–३ मा पाँच हजार ६११ र सुनसरी–४ मा छ हजार ६७४ मत बदर भएको छ । त्यस्तै, सोलुखुम्बुमा एक हजार ९९०, खोटाङमा तीन हजार ९२८, ओखलढुंगामा तीन हजार ३५६, उदयपुर–१ मा पाँच हजार ५४७ र उदयपुर–२ मा तीन हजार ६७३ मत बदर भएको छ ।
प्रदेशभर सबैभन्दा कम मत बदर झापा क्षेत्र–५ मा भएको छ । त्यहाँ तीन दशमलव ९६ प्रतिशत मत बदर भएको छ ।
