विराटनगर । आँपको राजधानीका रूपमा चिनिएको सिरहामा यस वर्ष आँपको उत्पादन बढ्ने अनुमान गरिएको छ । अधिकांश बोटमा मज्जर (फूल) लागेकाले पनि यसपालि आँपमा भारी मात्रामा उत्पादन हुने अनुमान गरिएको हो ।
कृषि ज्ञान केन्द्र सिरहाका अनुसार जिल्लामा करिब पाँच हजार हेक्टर क्षेत्रफलमा आँप खेती भइरहेको छ । एक वर्ष बिराएर फल्ने आँप यस वर्ष फल्ने चक्रमा परेकाले बोटमा अत्यधिक मज्जर लागेको छ ।
मज्जर जोगाउन एक पटक औषधि छरिसकिएको र टिकुला लागेपछि अर्को पटक औषधि छर्नका लागि प्राविधिक सहयोग पाएका किसान यसपटक आँप टन्नै फल्नेमा ढुक्क देखिएका छन् । यस वर्ष आँपमा प्रशस्त मञ्जर लागेको र मौसम अनुकूल रहने सम्भावानाले गर्दा गत वर्षको तुलनामा दोब्बर उत्पादन हुने अपेक्षा गरिएको हो ।
आँपको पकेट क्षेत्रका रूपमा परिचित सिरहाका विभिन्न पालिकामा आँपको फूल फुल्दानफूल्दै व्यापारीहरूले बोली लगाउँछन् । यसैले आँप खेतीबाट राम्रो आम्दानी हुने अपेक्षा गरेका किसानहरू यो वर्ष थप उत्साहित छन् । सिरहामा उत्पादित आँपले काठमाडौँको ४० देखि ५० प्रतिशत माग धान्छ भने कुल उत्पादनको करिब २५ प्रतिशत भारत र खाडी मुलुकसम्म निर्यात हुने गर्छ ।
