कानेपोखरी । निर्वाचन विरोधी गतिविधिमा संलग्न रहेको आरोपमा नेपाल कम्युनिष्ट पार्टी (बहुमत) का मोरङ जिल्ला इन्चार्ज र जिल्ला सचिवलाई प्रहरीले पक्राउ गरेको छ ।
विशेष सूचनाका आधारमा इलाका प्रहरी कार्यालय पथरीबाट खटिएको प्रहरी टोलीले दिउँसो करिब ४:३० बजे मोरङको कानेपोखरी गाउँपालिका–६ बुद्धचोकबाट उनीहरूलाई नियन्त्रणमा लिएको हो ।
पक्राउ पर्नेमा सुन्दरहरैंचा नगरपालिका–१० निवासी ५६ वर्षीय कृष्णप्रसाद चम्लागाईं (मोरङ जिल्ला इन्चार्ज) र झापा दमक नगरपालिका–५ निवासी ३७ वर्षीय सुमन पौडेल (मोरङ जिल्ला सचिव) रहेका छन् ।
प्रहरीका अनुसार उनीहरू निर्वाचन बहिष्कारसम्बन्धी गतिविधिमा संलग्न रहेको आरोप छ ।
साथै, सोही दिन दिउँसो करिब १२:१५ बजे सुन्दरहरैंचा नगरपालिका–१० स्थित पूर्व–पश्चिम राजमार्गको उत्तरतर्फ फेला परेको शंकास्पद ‘होक्स बम’ घटनासँग उनीहरूको संलग्नता हुन सक्ने आशंकामा समेत अनुसन्धान अघि बढाइएको छ ।
पक्राउ परेकाहरूबाट को ६ प ५११६ नम्बरको मोटरसाइकल १ थान, विभिन्न कम्पनीका मोबाइल ५ थान, पार्टीको झण्डा १ थान तथा पर्चा–पम्प्लेट १०७ थान बरामद गरिएको प्रहरीले जनाएको छ ।
हाल उनीहरूलाई इलाका प्रहरी कार्यालय पथरीमा राखी थप अनुसन्धान कार्य भइरहेको छ ।
