विराटनगर । मतदानको पूर्वसन्ध्यामा मोरङको कटहरी गाउँपालिबाट ४ लाख ६२ हजार रुपैयाँ बरामद भएको छ । मोरङ प्रहरीले कटहरी गाउँपालिका–३ स्थित हुलाकी सडकखण्डबाट ४ लाख ६२ हजार ५ सय रुपैयाँ नगद फेला पारेको हो ।
मंगलबार मध्यराति गरिएको सवारी चेकजाँचका क्रममा स्रोत नखुलेको उक्त नगद रकम बरामद गरेको प्रहरीले रकम ओसारपसारमा प्रयोग गरिएको पिकअप गाडी र चालकलाई नियन्त्रणमा लिएको छ ।
पक्राउ पर्नेमा जहदा गाउँपालिका–२ का अन्दाजी २४ वर्षीय विशाल टुडू रहेका छन् ।
विशेष सूचनाका आधारमा मंगलबार बिहानका राति करिब १ः३५ बजे चेकजाँच गर्दा जिल्ला प्रहरी कार्यालय मोरङबाट खटिएको प्रहरी टोलीले प्रदेश १–०२–००२ च ६६१० नम्बरको टाटा योद्धा पिकअप गाडी रोकेर खानतलासी गर्दा नगद फेला पारेको हो ।
मोरङ प्रहरी प्रमुख प्रहरी उपरीक्षक कवित कटवालका अनुसार गाडी विराटनगरबाट कटहरीतर्फ जाँदै थियो । बरामद रकम, गाडी र चालकलाई जिल्ला प्रहरी कार्यालय मोरङमा राखेर विभिन्न कोणबाट अनुसन्धान थालिएको एसपी कटवालको भनाइ छ ।
निर्वाचनका बेला पैसा बाँडेर आम मतदातालाई प्रलोभनमा पार्नका लागि यो रकम ओसारपसार भइरहेको हो कि भन्ने प्रहरीको आशंका छ । मंगलबार राति मात्रै जहदातिर मोरङ ५ का एक उम्मेदवारले आफ्ना प्रतिनिधि खटाएर मतदातालाई रकम वितरण गरिरहेको भन्ने खबर प्राप्त भएको थियो ।
यद्यपि, रकमको स्रोतबारे चालक टुडूले स्पष्ट जवाफ दिन सकेका छैनन् । रकमको वास्तविक स्रोतका बारेमा पत्ता लगाउन विस्तृत अनुसन्धान जारी रहेको र तथ्य पुष्टि भएपछि मात्रै औपचारिक निष्कर्षमा पुगिने प्रहरीले स्पष्ट पारेको छ ।
प्रहरीले उक्त रकम अवैध हुण्डी कारोबारसँग सम्बन्धित हुन सक्ने पनि आशंका गरेको छ ।
