भारतको झारखण्ड राज्यमा सोमबार बेलुकी एयर एम्बुलेन्स दुर्घटना हुँदा सातै जनाको मृत्यु भएको छ। राँचीबाट बिरामी लिएर दिल्ली उडेको विमान चतरा जिल्लामा दुर्घटनाग्रस्त भएको हो।
दिल्लीस्थित रेडबर्ड एयरवेज प्रालिद्वारा सञ्चालित बीचक्राफ्ट सी–९० (भिटी–एजेभी) विमान दुर्घटनामा परेको हो। नागरिक उड्डयन महानिर्देशनालय (डीजीसीए) का अनुसार विमान साँझ ७:११ बजे राँचीको बिरसा मुण्डा विमानस्थलबाट उडेको थियो। मौसम प्रतिकूल भएपछि मार्ग परिवर्तनको अनुरोध गरिएको थियो तर साँझ ७:३४ बजे कोलकाता एयर ट्राफिक कन्ट्रोलसँग सम्पर्क विच्छेद भएको जनाइएको छ।
दुर्घटनामा बिरामी ४१ वर्षीय सञ्जय कुमार, उनका सहयोगी विकास गुप्ता, चिकित्सक सचिन कुमार मिश्र, सहयोगी अर्चना देवी र धुरु कुमार तथा क्याप्टेन विवेक विकास भगत र सवराजदीप सिंहको मृत्यु भएको भारतीय दैनिक हिन्दुस्तान टाइम्सले जनाएको छ।
राँची विमानस्थलका निर्देशक विनोद कुमारले खराब मौसम सम्भावित कारण हुनसक्ने प्रारम्भिक अनुमान गरे पनि वास्तविक कारण अनुसन्धानपछि मात्र खुल्ने बताएका छन्। घटनाको छानबिन प्रक्रिया अघि बढाइएको छ।
