राष्ट्रिय युवा संघ नेपालले विश्वभरका नेपाली युवालाई डिजिटल प्लेटफर्ममार्फत एकीकृत गर्ने उद्देश्यसहित आयोजना गरेको ‘अन्तर्राष्ट्रिय आईटी युवा सम्मेलन २०२५’ भर्चुअल माध्यमबाट भव्य रूपमा सम्पन्न भएको छ । उक्त सम्मेलनको समुद्घाटन गर्दै सम्माननीय प्रधानमन्त्री केपी शर्मा ओलीले डिजिटल युगमा युवा नै परिवर्तनका मुख्य शक्ति भएको र विश्वभर छरिएर रहेका नेपाली युवालाई एकै डिजिटल प्लेटफर्ममा जोड्नु ऐतिहासिक कार्य रहेको बताएका छन् ।
प्रविधि र नवप्रवर्तनमार्फत नेपालको समृद्धि हासिल गर्ने अभियानमा युवाको योगदान निर्णायक हुने र त्यसको लागि सरकारले पनि पहलकदमी लिने अठोट व्यक्त गरेका छन् ।
सम्मेलनमा सञ्चार तथा सूचना प्रविधिमन्त्री पृथ्वी सुब्बा गुरुङले युवालाई प्रविधिमा सक्षम बनाउन सरकारले नीतिगत तथा संरचनागत सहयोग गर्ने प्रतिबद्धता व्यक्त गरेका छन् ।
उनले नेपालको डिजिटल रूपान्तरणलाई सफल बनाउन युवा पुस्ताको सक्रियता अत्यावश्यक भएको र यस अभियानलाई समर्थन र सफल बनाउन सरकारले आवश्यक कानुनी,नीतिगत र पूर्वाधारगत पहल गर्ने कुरामा जोड दिएका छन् ।
एक करोडभन्दा बढी नेपाली युवाको सहभागिता अपेक्षा गरिएको सम्मेलनमा शिक्षा तथा प्रविधि मन्त्रालयका सचिव, डिजिटल पूर्वाधार विज्ञ डा. सुदन झा, र साइबर सुरक्षाविद् प्रो. मोशे वाय. वार्डी लगायतका प्रतिष्ठित वक्ताहरूले आफ्नो भनाइ तथा कार्यपत्र प्रस्तुत गरेका थिए।
कार्यक्रममा नेपालको डिजिटल नीति, सूचना प्रविधि क्षेत्रमा सम्भावना र चुनौती, अन्तर्राष्ट्रिय अनुभव, रोजगारी तथा उद्यमशीलताको अवसरबारे गहन छलफल भएको थियो। साथै, विश्वभर रहेका नेपाली युवाले प्रविधि र नवप्रवर्तनमा आधारित आफ्ना सफलताका कथाहरू पनि प्रस्तुत गरेका थिए।
राष्ट्रिय युवा संघ नेपालका अध्यक्ष क्षितिज थेवेले यो सम्मेलन केवल भर्चुअल कार्यक्रम मात्र नभएर यो विश्वव्यापी युवाको साझा आन्दोलन भएको र यसले नेपालको डिजिटल भविष्यलाई युवा नेतृत्व र सहकार्यमार्फत अगाडि बढाउने मा जोड दिएका थिए ।
राष्ट्रिय युवा संघ नेपालले युवा पुस्तालाई प्रोत्साहन र ऊर्जा प्रदान गर्ने उद्देश्यले आफ्नो क्यालेन्डर नै बनाएर विभिन्न उद्यमशीलतामा युवाहरूलाई समाहित र सहभागिता गराउँदै लैजाने पनि अध्यक्ष थेबेले बताएका छन् । युवा संघले गत वर्ष पनि अन्तर्राष्ट्रिय एआई कन्फ्रेन्स भव्य कार्यक्रमबीच सम्पन्न गरेको थियो ।
