विराटनगर । मोरङको सुन्दरहरैंचा नगरपालिका-७ बेलगाछीमा बसको ठक्करबाट सिटी सफारीमा सवार एक जनाको मृत्यु भएको छ ।
सुन्दरहरैंचा-७ बेलगाछि चोकमा बिहीबार भएको उक्त दुर्घटनामा सुनसरी इटहरी उपमहानगरपालिका-४ बस्ने ६१ वर्षीय तुलसीप्रसाद गुरागाईंको मृत्यु भएको हो ।
पूर्वपश्चिम लोकमार्गमा विराटचोकबाट गछियातर्फ जाँदै गरेको मे १ ख २७९६ नम्बरको यात्रुबाहक बस (सुर्योदय कम्पनी) ले उत्तरबाट दक्षिणतर्फ बाटो क्रस
गर्दै गरेको प्र १-०२-००४ ह ४२२४ नम्बरको केरा लोड भएको सिटी सफारीलाई ठक्कर दिएको थियो ।
हिजो दिउँसो ३ः२० बजेतिर भएको उक्त दुर्घटनामा सिटी चालक दुहबी नगरपालिका-५ बस्ने ४२ वर्षीय बलबहादुर लिम्बू र सिटीमा सवार गुरागाईं गम्भीर घाइते भएका थिए ।
उनीहरूलाई उपचारको लागि नोबेल अस्पताल विराटनगरतर्फ ल्याइएको थियो । उपचारका क्रममा साँझ ५ः५५ बजेतिर गुरगाईंको मृत्यु भएको हो भने लिम्बूको अवस्था गम्भीर रहेको प्रहरीले जनाएको छ ।
प्रहरीले बस र बस चालक सुन्दरहरैंचा नगरपालिका-७ का ४२ वर्षीय लेप्चन साहलाई नियन्त्रणमा लिएको छ ।
बस तीव्र गतिमा भएका कारण दुर्घटना भएको प्रहरीको प्रारम्भिक अनुसन्धानले देखाएको छ ।
