विराटनगर । मोरङका दुई फरक स्थानमा दुई जना व्यक्तिको शव भेटिएको छ ।
मोरङको उर्लाबारी र बेलबारी नगरपालिकाको धानखेतमा दुई व्यक्तिको शव फेला परेको मोरङ प्रहरीले जनाएको छ ।
उर्लाबारी नगरपालिका–२ का २५ वर्षीय सुशील लिम्बू आफ्नै घर नजिकको धानखेतमा मंगलबार बिहान मृत अवस्थामा फेला परेका हुन् ।
प्रहरीले प्रारम्भिक अनुसन्धानपछि शवलाई मंगलबारेस्थित मदन भण्डारी अस्पताल एवम् ट्रमा सेन्टरमा पोस्टमार्टमका लागि पठाएको छ ।
यसैगरी, बेलबारी नगरपालिका–७ गिरी टोलका ४१ वर्षीय डमरु ऋषिदेव पनि सोमबार साँझ आफ्नै खेतमा मृत फेला परेका छन् ।
उनी साँझ करिब ६ः३० बजे युरिया मल छर्न भन्दै घरबाट खेततर्फ निस्किएका थिए ।
तर, केहीबेरमै उनको शव घोप्टो परेको अवस्थामा खेतमै फेला परेको प्रहरीले जनाएको छ ।
प्रहरीले ऋषिदेवको शव पनि घोप्टो परेको अवस्थामा फेला परेको र प्रारम्भिक रूपमा कुनै स्पष्ट घाउचोट नदेखिएको जनाएको छ ।
दुवै जनाको मृत्युको कारण खुल्न नसकेको र पोस्टमार्टम रिपोर्टपछि मृत्युको कारणबारे केही ठोस जानकारी आउन सक्ने प्रहरीले जनाएको छ ।
