१९ साउन, काठमाडौं । राष्ट्रिय परीक्षा बोर्डले सोमबार सार्वजनिक गरेको कक्षा १२ को नतिजा अनुसार विद्यार्थीहरू अंग्रेजी, लेखा र नेपाली विषयमा धेरै अनुत्तीर्ण भएको पाइएको छ ।
शिक्षक आन्दोलनका कारण अन्योलकाबीच गत ११ वैशाखका लागि तय भएको परीक्षा आन्दोलनका कारण २१ वैशाखदेखि भएको थियो ।
उक्त परीक्षामा सहभागीमध्ये ६१ दशमलव १७ प्रतिशत विद्यार्थी उत्तीर्ण भएका छन् । परीक्षामा नियमिततर्फ तीन लाख ९६ हजार ३४७ परीक्षार्थी सहभागी भएका थिए ।
बोर्डका अध्यक्ष महाश्रम शर्माकाअनुसार आंशिकतर्फ एक लाख १४ हजार ६४० गरी र कूल जम्मा पाँच लाख दश हजार ९८७ परीक्षार्थी सहभागी भएका थिए ।
अघिल्लो वर्षभन्दा यो वर्ष ९ प्रतिशतले परीक्षामा सुधार देखिएको छ । नतिजा अनुसार ६१.१७ प्रतिशत विद्यार्थी ग्रेडेड भएका छन् ।
गत वर्ष ५२ प्रतिशत विद्यार्थी ग्रेडेड भएका थिए । बोर्डका अनुसार नियमिततर्फ ३ लाख ९६ हजार ३४७ र आंशिकतर्फ १ लाख १४ हजार ६४० गरी ५ लाख १० हजार ९८७ जना विद्यार्थीले परीक्षा दिएका थिए ।
जसमध्ये २ लाख ४२ हजार ४६५ जना नियमिततर्फ र आंशिकतर्फ ४१ हजार ८४० जना गरी कूल २८४ हजार ३०५ विद्यार्थी ग्रेडेड भएका हुन् । नियमिततर्फ १ लाख ५३ हजार ८८२ जना विद्यार्थी ननग्रेडेड भएका छन् ।
बोर्डका अनुसार नियमिततर्फ ११ र आंशिकतर्फ ६ गरी १७ जना परीक्षार्थीको परीक्षा रद्द गरिएको छ ।
३.६१ देखि ४ जीपीए ल्याउने विद्यार्थी १३ हजार ५०२, ३.२१ देखि ३.६० जीपीए ल्याउने ५५ हजार ८९६, २.८१ देखि ३.२० जीपीए ल्याउने ९४ हजार २६८, २.४१ देखि २.८० जीपीए ल्याउन ६९ हजार ८१२, २.०१ देखि २.४० जीपीए ल्याउने ८ हजार ९६४ र १.६१ देखि २.०० जीपीए ल्याउने विद्यार्थी २३ जना छन् ।
आंशिकतर्फ ३६.४९ प्रतिशत मात्र उत्तीर्ण भएका छन् ।
बोर्डले प्रश्नपत्रमा सुधार गरेकाले पनि नतिजा राम्रो आएको प्रारम्भिक निचोड निकालेको छ ।
बोर्डका अध्यक्ष शर्माका अनुसार सबैभन्दा बढी विद्यार्थी अंग्रेजी र लेखामा भएका छन् ।
अंग्रेजीमा ६६ हजार २ सय ७५, लेखामा ४१ हजार २६३, सामाजिकमा ३३ हजार ९२१ र नेपालीमा २८ हजार ३५६ जना विद्यार्थी ननग्रेडेड भएका छन् ।
