संस्कृति, पर्यटन तथा नगरिक उड्डयनमन्त्री बद्रीप्रसाद पाण्डेले गौतमबुद्ध अन्तर्राष्ट्रिय विमानस्थल र पोखरा अन्तर्राष्ट्रिय विमानस्थल राष्ट्रिय गौरवका संरचना भएको बताएका छन् । संघीयता सबलीकरण तथा राष्ट्रिय सरोकार समितिले मन्त्रालय अन्तर्गतका राष्ट्रिय गौरवका आयोजनाका विषयमा गरेको छलफलमा मन्त्री पाण्डेले मन्त्रालय अन्तर्गत ५ आयोजना रहे पनि गौतमबुद्ध अन्तर्राष्ट्रिय विमानस्थल र पोखरा अन्तर्राष्ट्रिय विमानस्थल निर्माण सम्पन्न भइसकेको जानकारी दिए ।
अब यी दुई आयोजना राष्ट्रिय गौरवका संरचना हुने उनको भनाइ छ । मन्त्री पाण्डेले भने, ‘देशले अब यी आयोजनालाई राष्ट्रिय गौरवका संरचनामा राख्दै फाइदा लिनुपर्छ ।’
पशुपति र लुम्बिनीको गुरुयोजना अनुसार काम अगाडि बढाउन सरकार प्रतिबद्ध रहेको मन्त्री पाण्डेको भनाइ छ । निजगढ अन्तर्राष्ट्रिय विमानस्थललाई राष्ट्रिय गौरवको आयोजनाका रूपमा राखेको भए पनि निर्माणमा अन्योल रहेको उनले बताए ।
निजगढ अन्तर्राष्ट्रिय विमानस्थल देशका लागि अपरिहार्य रहेको भन्दै उनले निर्माण र सञ्चालन मोडालिटी बनाएर आगाडि बढ्ने बताए ।
भैरहवा र पोखरा विमानस्थल नचल्नुमा रुटको समस्या मात्र नभएको र सरकारका कतिपय निकायले नै सरकारले तयार पारेको कार्ययोजना लागु नगर्दा समस्या आएको उनको भनाइ छ ।
