न्याय सेवा आयोगले सर्वोच्च अदालतका रजिष्ट्रार विमल पौडेललाई मुख्य रजिष्ट्रारमा बढुवा गरेको छ । मुख्य रजिष्ट्रार देवेन्द्रराज ढकाल ५८ वर्षे उमेरहदका कारण आइतबारबाट अवकाशमा गएपछि न्याय सेवा आयोगको सोमबारको बैठकले पौडेललाई उक्त पदमा बढुवा गरेको हो । मुख्य रजिष्ट्रारमा बढुवा भएका पौडेलको स्थानमा सह-रजिष्ट्रार मानबहादुर कार्कीलाई जिम्मेवारी दिइएको छ। उनी सोमबारदेखि सह-रजिष्ट्रारबाट रजिष्ट्रार भएका छन् ।
उता महान्यायाधिवक्ताको कार्यालयका सह-न्यायाधिवक्ता सूर्यराज दाहाल सचिवमा बढुवा भएका छन् । उनलाई बेपत्ता पारिएका व्यक्तिको छानबिन आयोगमा पदस्थापन गरिएको छ । सत्य निरुपण तथा मेलमिलाप आयोगका सहसचिव निर्मला अधिकारीको पनि सचिवमा बढुवा भएको छ । उनलाई आयोगमै पदस्थापन गरिएको छ ।
सहसचिव इन्दिरा दाहाल भट्टराईको पनि सचिव पदमा बढुवा गरिएको छ । निर्वाचन आयोगमा कार्यरत उनलाई नेपाल कानुन आयोगमा पदस्थापन गरिएको छ ।
