विराटनगर । विराटनगर महानगरपालिका–११ जनपथ टोलमा रहेको गोल्डेन हस्पिटलमा बिरामीका आफन्तले तोडफोड गरेका छन् ।
पानीमा डुबेकी बालिकालाई सुरुमा मृत घोषित गरेर पुनः उपचार थालेको गोल्डेनमा आइतबार दिउँसो तोडफोड भएको हो ।
विराटनगर-६ रामपुर चोकका दीपक पासवानकी तीन वर्षीया छोरी आरुषी पासवान नजिकैको खोलामा डुबेकी थिइन् ।
आइतबार बिहान खोलामा डुबेर अचेत अवस्था भएकी आरुषीलाई उपचारका लागि गोल्डेन अस्पताल पुर्याएको थियो ।
बिहान ११ बजे अस्पताल पुर्याउँदा चिकित्सकले बाँच्ने सम्भावना झिनो रहेको भन्दै भर्ना लिएको आफन्तको भनाइ छ ।
गोल्डेनका डाक्टर सन्तोषकुमार यादवले उपचाररत बालिकालाई दिउँसो १ बजे मृत घोषणा गरेका थिए ।
त्यसपछि आफन्तले शव लैजान खोजेका थिए । तर, १० मिनेटपछि नै डाक्टरले ‘बालिकाको सास आयो’ भन्दै उपचारलाई निरन्तरता दिएका थिए ।
तथापि, डाक्टर यादवले आरुषीको बाँच्ने सम्भावना भने न्युन रहेको बताएको उनका बुबा दीपकको भनाइ छ ।
उपचार सम्भव नदेखेपछि निरास आफन्तले आरुषीलाई घर लैजाने बताएपछि डा. यादवले उनीहरूलाई ‘उपचार गर्ने औकात’ नभएको भन्दै अपमानजनक भाषा बोलेका थिए ।
त्यसपछि आक्रोशित आफन्तले अस्पतालमा तोडफोड गरेका हुन् ।
तोडफोडपछि भने डाक्टर यादवले आरुषीका आफन्तसँग माफी मागेका थिए ।
अपमानजनक व्यवहार गर्ने डा. यादवले माफी मागेपछि सोमबार गम्भीर अवस्थाकी बालिकालाई घर लैजानेगरी सहमति भएको छ ।
गोल्डेन अस्पताल पटकपटक विवादित हुँदै आएको छ । यसअघि गोल्डेन अस्पतालले उपचार खर्च तिर्न नसकेपछि शव बन्धक बनाएको थियो ।
गत वर्षको चैतमा मोटरसाइकल दुर्घटनामा परी घाइते भई उपचारका लागि आएका व्यक्तिको मृत्यु भएपछि एक युवकको शव अस्पतालले बन्धक बनाएर राखेको थियो ।
