विराटनगर । जनप्रिय जननेताको रूपमा परिचित बिपी कोइरालाको ४३औँ स्मृति दिवसका अवसरमा दुहबी नगरपालिकामा अन्तर सामुदायिक माध्यमिक विद्यालयस्तरीय हाजिरीजवाफ प्रतियोगिता आयोजना भएको छ ।
नेपाली कांग्रेस दुहबी नगर कार्यसमितिको आयोजनामा मंगलबार आयोजित प्रतियोगितामा दुहबी नगरभित्रका ६ वटा सामुदायिक विद्यालयका विद्यार्थीहरूले भाग लिएका थिए । जसमा १५ अंक प्राप्त गरी प्रथम स्थान ओगट्न सफल दुहबी-५ को सरस्वती माविले १२ हजार रुपैयाँ नगद र मेडल-प्रमाणपत्र प्राप्त गर्यो ।
यसैगरी १० अंक प्राप्त गरी द्वितीय बन्न सफल जनता माविले ९ हजार रुपैयाँ नगद पाउँदा ८ अंक प्राप्त गरेर तृतीय स्थान हासिल गरेको विष्णु माविले ६ हजार रुपैयाँ नगद र प्रमाणपत्र तथा मेडल हात पार्यो ।
साथै, सहभागी अन्य तीन विद्यालयलाई पनि नगद रु एक हजार रुपैयाँ र प्रमाणपत्र प्रदान गरिएको थियो । उनीहरूलाई कांग्रेसका दुहबी नगरसभापति तथा दुहबीका मेयर वेदनारायण गच्छदारलगायतले पुरस्कृत गरेका थिए ।
कार्यक्रमको औचित्यबारे प्रकाश पार्दै गच्छदारले विद्यार्थीहरूका लागि नगरपालिकाले अथक काम गरिरहेको बताए । विद्यार्थीहरूलाई सिपसँगै रोजगारसम्म जोड्नका लागि नगरकै परिकल्पनामा बनेको श्रम संसार एप अहिले प्रदेश हुँदै संघमा समेत कार्यान्वयन भइरहेकोमा आफू गौरभान्वित बनेको उनको भनाइ छ ।
कार्यक्रमकै अवसर पारेर दुहबीका पुराना कांग्रेसका १२ नेताहरूलाई सम्मान गरिएको थियो । सम्मानित हुनेहरूमा सत्यनारायण चौधरी, धर्मनारायण विश्वास, जगुलाल माझी, गुलाबी मियाँ, गौरीशंकर रौनियार, अभिनाष मण्डल, झुमाई माझी, मोहम्मद अलाउदिन मियाँ, मिश्रीलाल मुसहर, कृष्णकुमार चौधरी र रामनारायण थारू रहेका छन् ।
कार्यक्रमका प्रमुख अतिथिसमेत रहेका कांग्रेसको भातृ संस्था नेपाल तरुणदल नगर सभापति मोहम्मद नसुरुद्दिन मियाँले पुराना नेताहरूलाई सम्मान गरेर पार्टीमा उनीहरूको योगदानलाई प्रकाश पार्न खोजिएको बताए ।
