जुवातास खेलिरहेको अवस्थामा काठमाडौं र चितवनबाट प्रहरीले २६ जनालाई पक्राउ गरेको छ ।
काठमाडौं-१३ ताहाचल बस्ने बिम्मा छिरिङ दोर्जे लामाको कोठाबाट जुवातास खेलिरहेको अवस्थामा बिम्मासमेत ५ जनालाई शुक्रबार बिहान पक्राउ गरेको प्रहरीले जनाएको छ । प्रहरी वृत्त कालिमाटीले उनीहरूको साथबाट नगद १ लाख ३५ हजार ३ सय रूपैयाँ र २४ बुक तास बरामद गरेको छ ।
यसैगरी काठमाडौं-३१ भूपिशेरचन मार्ग बस्ने साबित्री श्रेष्ठको कोठामा जुवातास खेलिरहेको अवस्थामा श्रेष्ठसमेत पाँच जनालाई शुक्रबार साँझ प्रहरीले पक्राउ गरेको छ । प्रहरी वृत्त नयाँ बानेश्वरले नगद ८५ हजार ६ सय २० रूपैयाँ र ६ बुक तास फेला पारेको छ ।
यस्तै भरतपुर-१ पोखरा बसपार्कस्थित धादिङ होटलबाट जुवातास खेलिरहेको अवस्थामा तनहुँ देवघाट-४ का मानबहादुर मगरसमेत पाँच जनालाई शुक्रबार साँझ प्रहरीले नियन्त्रणमा लिएको छ ।
जिल्ला प्रहरी कार्यालय चितवनले उनीहरूको साथबाट नगद ३८ हजार ९ सय रूपैयाँ र १ बुक ताससहित पक्राउ गरेको हो । चितवनकै भरतपुर -२ क्षेत्रपुरका पदमबहादुर आलेको घरमा जुवातास खेलिरहेको अवस्थामा सो विनोद मल्लसमेत ११ जनालाई शुक्रबार बेलुकी प्रहरीले पक्राउ गरेको छ ।
जिल्ला प्रहरी कार्यालय चितवनले उनीहरूलाई नगद ५१ हजार ९ सय ९० रूपैयाँ र ४ बुक ताससहित पक्राउ गरेको हो । प्रहरीले आवश्यक अनुसन्धान गरिरहेको जनाएको छ ।
