विराटनगर । मोरङको बेलबारी नगरपालिकामा आइतबार बिहान जंगली हात्तीको आक्रमणबाट एक महिलाको मृत्यु भएको छ ।
मृत्यु हुनेमा बेलबारी नगरपालिका-८ बाँसबारीकी ४५ वर्षीया अमिना राजवंशीको रहेको जिल्ला प्रहरी कार्यालय मोरङका प्रहरी नायब उपरीक्षक एवम् कोपिला चुडालले जानकारी दिइन् ।
उनका अनुसार अमिनासहित ३५ वर्षीया बन्दना राजवंशी आफ्नै घरनजिकको खेतमा पानी लगाउन गएका बेला हात्तीले अमिनालाई आक्रमण गरेको थियो ।
आक्रमणबाट गम्भीर घाइते भएकी अमिनालाई उपचारका लागि विराटनगरको न्युरो अस्पताल पठाइएको थियो । उपचारका क्रममा उनको मृत्यु भएको प्रहरीले जनाएको छ ।
बेलबारी-८ को बाँसबारी पूर्वपश्चिम राजमार्गबाट दक्षिणको गाउँ हो । राजमार्ग दक्षिण तर्फ डेढ किलोमिटर मात्र जंगल पर्छ ।
जंगलबाट गाउँ पसेर अमिनालाई हात्तीले आक्रमण गरेपछि स्थानीय त्रसित भएका छन् ।
स्थानीयका अनुसार पूर्व-पश्चिम राजमार्गको मोरङ खण्डमा पर्ने जंगल क्षेत्रमा केही दिनयता जंगली हात्ती घुमिरहेका छन् ।
