नवलपरासी पूर्वमा एम्बुलेन्स र स्कुल भ्यान ठोक्किँदा एक जनाको मृत्यु भएको छ।
सोमबार बिहान साढे ८ बजे पूर्वी नवलपरासीको देवचुली नगरपालिका-२ दुम्कौली चोकस्थित पूर्व-पश्चिम राजमार्गमा बिरामी बोकेको एम्बुलेन्स र विद्यालयको भ्यान ठोक्किएको हो।
बुटवलबाट बिरामी लिएर नारायणघाटतर्फ जाँदै गरेको ना ४ च १६४६ नम्बरको एम्बुलेन्स र दुम्कौली जाँदै गरेको दिव्य एकेडेमी बोर्डिङ स्कुलका विद्यार्थी बोकेको भ्यान आपसमा ठोक्किएको थियो।
पूर्वी नवलपरासी प्रहरीका अनुसार दुर्घटनामा स्कुल भ्यानका चालक देवचुली नगरपालिका-१ का बस्ने ५२ वर्षीय कुलप्रसाद सुवेदीको मृत्यु भएको हो।
टाउको र दुवै खुट्टामा चोट लागी उपचारका लागी उनलाई पुरानो मेडिकल कलेज भरतपुर चितवन पुर्याइएकोमा बिहान ९:२० बजे उपचारकै क्रममा मृत्यु भएको प्रहरीले जनाएको छ।
दुर्घटनामा बुटवल उपमहानगरपालिका-३ गोलपार्कका ३६ वर्षीया लक्ष्मी राई, २५ वर्षीया इसु राइ, २५ वर्षीया स्नेहा परियार छन्। उनीहरू एम्बुलेन्समा बिरामी लिएर आउँदै थिए।
दुई जना विद्यार्थीहरू देवचुली गाउँपालिका-१७ कि आयुसा गौतम र सोही गाउँपालिका-४ का ६ वर्षीय सोखनिया रोक्का सामान्य उपचारपश्चात डिस्चार्ज भएका छन्।
एम्बुलेन्समा आएका बिरामीलाई अन्य एम्बुलेन्समा राखेर चितवन पठाइएको प्रहरीले जनाएको छ।
