विराटनगर । कोशी प्रदेशको राजधानी विराटनगरमा जारी सीप उत्सव २०८२ अन्तर्गत आज फाइनल चरणको प्रतिस्पर्धा हुँदै छ ।
उद्योग संगठन मोरङको सभाहलमा जारी पहिलो संस्करणको सीप उत्सवअन्तर्गत आज अन्तिम चरणको प्रतिस्पर्धा हुन लागेको हो ।
आज सूचना प्रविधि, होटल म्यानेजमेन्ट र अटो मोबाइल विधामा उत्कृष्ट भएका प्रतिस्पर्धीहरूले उपाधिका लागि प्रतिस्पर्धा गर्न लागेका हुन् ।
उद्योग संगठन मोरङ, इन्स्योर र हेल्भेटास नेपालको संयुक्त आयोजना तथा सामाजिक विकास मन्त्रालयको समनव्यमा भइरहेको सिप उत्सवको पहिलो दिन शनिबार (हिजो) प्रत्यक्ष तालिम र करिअर काउन्सिलिङ भएको थियो ।
सामाजिक विकास मन्त्री पाँचकर्ण राईको प्रमुख आतिथ्यता र उद्योग संगठन मोरङका अध्यक्ष राकेश सुरानाको अध्यक्षतामा भएको उत्सवको पहिलो दिन विभिन्न स्कुलका विद्यार्थीहरूले पेशाकर्मी एवम उद्यमीमार्फत वृत्ति विकास परामर्श पाएका थिए ।
लक्ष्मी घिमिरे, रवि गुप्ता, प्रदीप निरौला, सुजित झा, नविन झुनझुनवाला, राक्तिम जोशी, पवन साह, नारायण लामिछाने, रविन्द्रबहादुर सिंह, सञ्जयकुमार श्रेष्ठ र किरण ब्यासलगायत उद्यमी तथा पेशाकर्मीले विद्यार्थीहरूलाई वृत्ति परामर्श गराएका थिए ।
कार्यक्रममा बोल्दै मन्त्री राईले निजी क्षेत्रसँग सहकार्य गरेर आयोजना गरिएको सिप उत्सवले औद्योगिक प्रशिक्षार्थी र रोजगारदाताबीच पुलको काम गर्नेमा आफू विश्वस्त रहेको सुनाए ।
वैशाख २२ देखि ३० गतेसम्म सीप उत्सवको अडिसन राउन्ड भएको थियो ।
प्रदेशका सात प्राविधिक शिक्षालयहरूमा अध्ययनरत सयभन्दा बढी प्रशिक्षार्थीबीच तीन विधामा भएको स्पर्धाबाट १६ जना छानिएका थिए ।
इटहरीको नरबहादुर बहुप्राविधिक शिक्षालय, बूढीगंगाको मनमोहन स्मृति पोलिटेक्निक, जहदाको शैलजा आचार्य स्मृति पोलिटेक्निक, कन्काईको कन्काई पोलिटेक्निक, दमकको पुष्प-धीरेन्द्र स्मृति प्रतिष्ठान, विराटनगरको आदर्श माध्यमिक विद्यालय र बिर्तामोडको नरबहादुर कर्माचार्य स्मृति प्रतिष्ठानमा सीप प्रतिस्पर्धा र सीप प्रदर्शनी भएको थियो ।
कम्प्युटर असोसियसन अफ नेपाल महासंघ (क्यान) मोरङ, होटल म्यानेजमेन्ट असोशसियसन अफ नेपाल (हान), नेसनल अटोमोबाइल डिलर्स असोसियसन अफ नेपाल (नाडा) समेत यस कार्यक्रमको सहयोगी संस्थाका रूपमा रहेका छन् ।
यस सीप उत्सवमा फरक ढंगबाट उद्योग आफैं अग्रसर भइ प्रत्यक्ष रूपमा सीप र वृत्ति परामर्श गरी दक्ष जनशक्ति उत्पादनमा महत्त्वपूर्ण भूमिका रहने आयोजक इन्स्योर परियोजनाका घनश्याम लिम्बुको भनाइ छ ।
सीप उत्सवले विद्यार्थीहरूलाई प्राविधिक ज्ञान र सीप प्रदर्शन गर्ने र करिअर निर्माणमा सहयोग पुग्ने लिम्बुले बताए ।
