विराटनगर । अब बहालवाला नेपाल प्रहरीका छोराछोरीले निःशुल्क शिक्षा पाउने भएका छन् ।
निजी तथा आवासीय विद्यालय अर्गनाइजेसन नेपाल (प्याब्सन) र कोशी प्रदेश प्रहरी कार्यालय विराटनगरबीच उक्त समझदारी भएको हो ।
विराटनगरस्थित कोशी प्रदेश प्रहरी कार्यालयको सभाहलमा बुधबार (आज) उक्त समझदारी-पत्रमा हस्ताक्षर भएको हो ।
कोशी प्रदेश प्रहरी प्रमुख प्रहरी नायब महानिरीक्षक राजन अधिकारी र प्याब्सन कोशी प्रदेशका अध्यक्ष सुमित थापाबीच सम्झौता भएको हो ।
प्रहरी सेवालाई सम्मान गर्न बहालवाला नेपाल प्रहरी कर्मचारीहरूका सन्ततिहरूलाई निःशुल्क शिक्षा प्रदान गरी शैक्षिक विकासमा सहकार्य गर्ने/गराउने उद्देश्यले उक्त सम्झौता भएको हो ।
कार्यक्रममा प्रहरी कर्मचारीहरूलाई थप सेवा प्रदान गर्ने उद्देश्यले ब्यवस्थित तबरले चलिरहेका विद्यालयहरूसँग समन्वय र सहकार्य गरी समसामयिक विषयमा अन्तरक्रिया तथा छलफलसमेत गरिएको थियो ।
कार्यक्रममा बोल्दै प्रदेश प्रहरी प्रमुख अधिकारीले प्रहरी कर्मचारीहरूको मनोबल उच्च बनाई प्रहरी पेशालाई सम्मानका साथ अगाडि बढाउँदै लैजान समाजका विभिन्न संघ-सस्थाहरूसँग समन्वय र सहकार्य गरिँदै आइएको बताए ।
उनले आफ्नो घर-परिवार नभनी अहोरात्र खटिने व्यवसायिक प्रहरीको मनोबल उच्च बनाउने कार्यमा हौसला प्रदान गरेकोमा प्याब्सनका सम्पूर्ण पदाधिकारीहरूलाई आभार व्यक्त गरे ।
कार्यक्रममा कोशी प्रदेश प्रहरी कार्यालय विराटनगरका प्रहरी वरिष्ठ उपरीक्षक भीमबहादुर दाहाल, प्रहरी वरिष्ठ उपरीक्षक गोबिन्द अधिकारी, सिनीयर प्रहरी अधिकृत तथा प्याव्सन कोशी प्रदेशका अध्यक्ष सुमित थापा, केन्द्रीय उपाध्यक्ष टीकाराम ढकाललगायत प्याव्सन कोशी प्रदेशका पदाधिकारीहरूको उपस्थिति थियो ।
