विराटनगर । मोरङको ग्रामथान गाउँपालिकाका अध्यक्ष नमोनारायण माझीले आफ्नो अनुपस्थितिमा वडाध्यक्षलाई कार्यवाहक अध्यक्षको जिम्मेवारी दिएको निर्णय कार्यान्वयन नगर्न उच्च अदालत विराटनगरले अन्तरिम आदेश जारी गरेको छ ।
गाउँपालिका अध्यक्ष माझी नौ दिने चीन भ्रमणमा जानुअघि सोमबार वडा नम्बर ३ का अध्यक्ष रमेशकुमार भगतलाई कार्यवाहक अध्यक्षको जिम्मेवारी दिएका थिए ।
स्थानीय सरकार सञ्चालन ऐन अनुसार उपाध्यक्षलाई यो जिम्मेवारी दिनुपर्नेमा वडाध्यक्षलाई दिएको विषयमा उपाध्यक्ष गुणवतीदेवी थारूले अदालतमा रिट दायर गरेकी थिइन् ।
उच्च अदालतका कामु मुख्यन्यायाधीश ध्रुवराज नन्दको इजलासले स्थानीय सरकार सञ्चालन ऐन, २०७४ को दफा १६ अनुसार अध्यक्ष सात दिनभन्दा बढी समय अनुपस्थित हुने भएमा उपाध्यक्षलाई कार्यभार दिनुपर्ने व्यवस्था रहेको उल्लेख गर्दै अन्तरिम आदेश जारी गरेको हो ।
“उपाध्यक्ष पदमा बहाल रहिरहेको अवस्थामा निजले प्रयोग गर्न पाउने अधिकारबाट वञ्चित हुने स्थिति सृजना भएको” भन्दै अदालतले कानूनको उचित प्रयोगको दृष्टिकोणबाट अन्तरिम आदेश दिएको जनाएको छ।
मंसिरको उपनिर्वाचनमा माओवादी केन्द्रबाट निर्वाचित अध्यक्ष माझी र उपाध्यक्ष थारूबीच सम्बन्ध राम्रो नरहेको बताइएको छ।
माझीले आफ्नो विदाईमा पनि उपाध्यक्ष नआएको भन्दै वडाध्यक्षलाई कार्यवाहक जिम्मेवारी दिएको उल्लेख गरिएको छ ।
यसअघि पनि कार्यपालिकाको निर्णयविरुद्ध उपाध्यक्ष थारूले उच्च अदालतमा रिट दायर गरेकी थिइन्, जसमा अदालतले निर्णय कार्यान्वयन नगर्न आदेश दिएको थियो ।
