विराटनगर । पाँचथरको कुम्मायक गाउँपालिकामा वनमा लागेको डढेलोमा परेर घाँस काट्न गएकी युवतीको मृत्यु भएको छ ।
पाँचथरको कुम्मायकमा डढेलोमा पर्दा गम्भीर घाइते भएकी २२ वर्षीया प्रतिमा सम्वाहाम्फेको मृत्यु भएको हो ।
उनको उपचारका लागि धरान लैजाँदै गर्दा धनकुटास्थित भेडेटार नजिक पुगेपछि ज्यान गएको जिल्ला प्रहरी कार्यालय पाँचथरका प्रहरी निरीक्षक विनालाल साहले जानकारी दिए ।
कुम्मायक-३ ताम्राखुका अमरसिंह थापा र पदम खड्काको निजी वनमा डढेलो लागेको थियो ।
जसमा परेर घाइते भएका स्थानीय २८ वर्षीया सपना सम्बाहाम्फे, उनकी ११ वर्षीया छोरी सिवाना सम्बाहाम्फे र ६० वर्षीया निरमाया सम्बाहाम्फेलाई उपचारार्थ धरानस्थित बिपी कोइराला स्वास्थ्य विज्ञान प्रतिष्ठानमा भर्ना गरिएको छ ।
उनीहरूको पनि अवस्था चिन्ताजनक रहेको बताइएको छ ।
आगो निभाउने क्रममा कुम्मायक १ का धनबहादुर विश्वकर्माको पनि खुट्टा भाँचिएको छ ।
यस्तै फिदिम नगरपालिका १३ जौवारीको जंगलमा बिहीबार मध्यान्ह लागेको डढेलोमा पर्दा ४७ वर्षकी स्थानीय उषाकला नेम्वाङ राई गम्भीर भएकी छन् ।
उनी जंगलमा दाउरा खोज्न गएका बखत सल्केको डढेलोमा पर्दा जलेकी हुन् ।
नेम्वाङलाई पाँचथर अस्पतालमा प्रारम्भिक उपचारपश्चात् थप उपचारका लागि धरानस्थित बिपी कोइराला स्वास्थ्य विज्ञान प्रतिष्ठान ल्याइएको प्रहरीले जनाएको छ ।
उनको पनि अवस्था गम्भीर छ ।
