काठमाडौं । सरकारले काठमाडौंमा शुक्रबार (आज) भएको आगजनी, तोडफोड र लुटपाटको घटनामा दुर्गा प्रसाईंलाई मुख्य जिम्मेवार ठहर गरेको छ ।
राजतन्त्रको पुनर्स्थापनाका लागि शुक्रबार भएको आन्दोलनमा काठमाडौंको तीनकुने, कोटेश्वर, त्रिभुवन विमानस्थललगायतका क्षेत्रमा आगजनी, लुटपाट, तोडफोड र सुरक्षाकर्मीमाथि आक्रमण भएको थियो ।
त्यसबाहेक काठमाडौंको तीनकुनेमा राजावादी प्रदर्शनकारीले आगजनी गरेको घरभित्र एकजना व्यक्ति जलेर चिन्न नसकिने अवस्थामा मृत फेला परेका थिए ।
प्रहरीका अनुसार लिंगसमेत पहिचान नभएका ती व्यक्तिको सनाखत भएको छैन । तीनकुनेको रोयल बैंक्वेट नजिकैको घरमा राजावादीहरुले शुरुमा तोडफोड गरेर त्यसपछि आगो लगाएका थिए ।
यी घटनाहरूमा मुख्य जिम्मेवार ठहर गर्दै प्रसाईंलाई पक्राउ गर्न सरकारले आदेश दिएको हो ।
भिडलाई उक्साएर अराजकता मच्चाएपछि प्रसाईं तीनकुनेबाट अपराह्नतिर बाहिरिएका थिए ।
प्रसाईंलाई पक्राउ गर्न प्रहरी परिचालन भइसकेको काठमाडौं प्रहरी परिसरका प्रमुख एसएसपी विश्व अधिकारीले बताए ।
प्रहरीले आन्दोलनको अघिल्लो दिन केही व्यक्तिमाझ दुर्गा प्रसाईले आन्दोलनमा दमन गर्ने अवस्था ल्याउने र एक दुई जना मान्छे मरेपछि नेताहरूका घर र पार्टी कार्यालयमा छिर्ने योजना बनाएको भिडिओसमेत भेटेपछि उनलाई पक्राउ गर्न लागिएको हो ।
सरकारले पूर्वराजा र दुर्गा प्रसाईंलाई आजको तोडफोड, आगजनी र लुटपाटपमा जिम्मेवार ठहर गरेको छ । तथापि, उनलाई पक्राउ गर्ने विषयमा भने सरकारको आधिकारिक धारणा सार्वजनिक भइसकेको छैन ।
