इलाम । आगामी बिहीबार (चैत ७ गते) देखि सुरु हुने यो वर्षको एसइई परीक्षामा सहभागी हुने विद्यार्थीलाई इलाममा विद्यालय पोशाक अनिवार्य गरिएको छ ।
जिल्लास्थित शिक्षा विकास तथा समन्वय इकाईले आज जिल्लाका सबै माध्यमिक विद्यालयलाई पत्राचार गर्दै विद्यार्थीलाई विद्यालय पोशाक अनिवार्य भएको सूचना गरेको हो ।
इकाइ प्रमुख शालिग्राम दाहालले पठाएको पत्रमा परीक्षा आचारसंहिता पालना गराउँदै कपि किताब, गेसपेपर, मोबाइल फोन, ट्याब, चिब्स, स्मार्ट घडी तथा अन्य इलेक्ट्रोनिक सामग्रीहरु समेत परीक्षामा नलान सूचित गर्न अनुरोध गरिएको छ ।
यसवर्ष इलाममा एसइईका लागि २६ परीक्षा केन्द्र निर्धारण गरिएको छ । यसवर्ष नियमिततर्फ तीन हजार ३८० र ग्रेडवृद्धि तर्फ आठसय २९ परीक्षार्थी रहेको जनाइएको छ ।
प्राविधिकधार र पुरानो पाठ्यक्रम (२०७८–०७९) ग्रेडवृद्धि लेख्ने सबै परीक्षार्थीका लागि भगवती मावि गोलाखर्क र २०८० को नयाँ पाठ्यक्रमको ग्रेडवृद्धि लेख्ने परीक्षार्थीका लागि नियमित परीक्षा केन्द्र निर्धारण गरिएको समेत शिक्षा विकास तथा समन्वय इकाई इलामले जनाएको छ ।
