विराटनगर । पूर्वप्रधानमन्त्री तथा माओवादी केन्द्रका अध्यक्ष पुष्पकमल दाहाल प्रचण्डको तस्बिर जलाउने राप्रपाका नेतालाई प्रहरीले पक्राउ गरेको छ ।
राष्ट्रिय प्रजातन्त्र पार्टी (राप्रपा) निकट राष्ट्रिय प्रजातान्त्रिक युवा संगठनका सदस्य सचिव निराजन बम पलाँतालाई प्रहरीले पक्राउ गरेको हो ।
उनलाई चितवनको भरतपुर विमानस्थलबाट पक्राउ गरेको प्रहरी स्राेतले पुष्टि गरेकाे छ ।
पलाँताले शनिबार मकवानपुरको जिल्ला अधिवेशनको क्रममा प्रचण्डको तस्बिर जलाएका थिए ।
जिल्ला अधिवेशनमा मन्तव्य दिने क्रममा उनले प्रचण्डको तस्बिर जलाएका थिए ।
प्रचण्डले पूर्वराजा ज्ञानेन्द्र शाहलाई भाइमारा तथा मूर्तिचोरको आरोप लगाएको भोलिपल्ट शनिबार हेटौंडामा उनको तस्बिर जलाइएको हो ।
प्रचण्डको मेलम्ची अभिव्यक्तिको ‘साइड इफेक्ट’को रुपमा उनको तस्बिर जलाउनुपर्ने कारण बनेको व्याख्या गरेको छ ।
शुक्रबार प्रचण्डले सिन्धुपाल्चोकको मेलम्चीमा भएको सभालाई सम्बोधन गर्दै राजतन्त्रप्रति कडा टिप्पणी तथा पूर्वराजालाई भाइमारा र मूर्तिचोर को हो भनेर सोधेका थिए ।
प्रचण्डको उक्त अभिव्यक्तिपछि आक्रोशित राजावादी पार्टी राप्रपाले त्यसको प्रतिकारको रूपमा शनिबार हेटौंडामा उनको तस्बिर जलाएको जनाएको हो ।
प्रचण्डको तस्बिर जलाएपछि युवा नेता पलाँताले सामजिक सञ्जाल फेसबुकमा पोष्ट गर्दै भनेका छन्, ‘प्रचण्डको अभिव्यक्तिले देशलाई हिंसामा धकेल्न खोजेको र हाम्रो राजालाई अनावश्यक रुपमा आरोपप्रत्यारोप लगाएर वातावरण प्रदूषण गर्न खोजेकोले आज मञ्चबाटै प्रचण्डलाई १७ हजार मान्छे मारेको बिर्सिनुभएको छैन होला नि भनेर सन्देश दिएको छु । मूर्ति चोर हुम्लाका लामालाई मन्त्री र माननीय बनाएको बिर्सिनुभयो ।’
गत फागुन ७ गते पूर्वराजा ज्ञानेन्द्रले पोखराबाट एउटा भिडियो सन्देश जारी गर्दै आफू सक्रिय हुन लागेको सन्देश दिएपछि उत्साहित राजावादीहरुले फागुन २५ गते उनी काठमाडौं फर्कंदा भव्य स्वागत गरेका थिए ।
उक्त घटनापछि नेपालमा अहिले राजावादी र गणतन्त्रवादीबीच आरोपप्रत्यारोप चलिरहेको सन्दर्भमा हेटौंडामा आयोजित कार्यक्रमको मञ्चमै प्रचण्डको तस्बिर जलाइएको थियो ।
उक्त मञ्चमा राप्रपाका नेता एवं मकवानपुरकै क्षेत्र नम्बर १ बाट विजयी संघीय सांसद दीपकबहादुर सिंह उपस्थित थिए । उनले प्रचण्डको तस्बिर जलाइनु जनताको आक्रोश रहेको प्रतिक्रिया दिएका छन् ।
जबकि, उनी दुई वर्षअघि गणतन्त्रवादी दलहरूसँग मिलेरै सत्तामा बसेका थिए ।
