विराटनगर । मोरङको विराटनगर महानगरपालिका-१० मेनरोडमा अवस्थित कान्तिपुर कलेजले ‘साइनिङ स्टार’ नामक नृत्य प्रतियोगिताका विजेताहरूलाई पुरस्कृत गरेको छ ।
१० औं वार्षिकोत्सवको अवसरमा आइतबार भव्य कार्यक्रमको आयोजना गरी कलेजले उक्त प्रतियोगिताका विजेता विद्यार्थीहरूलाई पुरस्कृत गरेको हो ।
कलेजका विद्यार्थीहरूको सिर्जनात्मक क्षमता अभिवृद्धि गर्ने उद्देश्यका साथ आयोजित ‘कान्तिपुर साइनिङ स्टार–२०८१’ मा अविसा लिम्बु प्रथम बनेकी थिइन् ।
यस्तै, द्वितीय स्नेहा भण्डारी र तृतीय निकिता भुजेल भइन् ।
विद्यार्थीहरूको प्रतिभा प्रस्फुटनमा सघाउ पुर्याउने यस प्रतियोगिताका विजेताहरूले क्रमशः पाँच हजार एक सय, चार हजार एक सय र तीन हजार एक सय रुपैयाँ पुरस्कार पाए ।
प्रतियोगिताको निर्णायकहरुमा नृत्य निर्देशक मनोज राजवंशी, समीक्षा कार्की र अन्जु गौतम रहेकी थिइन् ।
कक्षा ११ सम्म विज्ञान, व्यवस्थापन, होटल व्यवस्थापन, र कम्प्युटर विज्ञान पठाइ हुने उक्त कलेजमा २०७२ सादेखि नयाँ व्यवस्थापन आएर स्कुल र कलेज सञ्चालनमा ल्याएपछि सर्वोउत्कृष्ट नतिजा ल्याउन सफल भएको कलेजका प्रिन्सिपल भेषराज नेपाल ‘भुवन’ ले बताए ।
कान्तिपुर स्कुलमा पढेका विद्यार्थीलाई विश्व बजारमा प्रतिस्पर्धा गर्न योग्य बनाउने र देशको लागि आवश्यक पर्ने दक्ष जनशक्ति उत्पादन गर्ने ध्येयले अगाडि बढेको उनको भनाइ छ ।
विद्यालयका अध्यक्ष खुसीराज श्रेष्ठको सभापतित्वमा उक्त कार्यक्रम भएको हो ।
शुक्रबारदेखि सुरु भएको तीन वार्षिकोत्सव कार्यक्रमको पहिलो दिन बालकक्षादेखि ३ सम्मका विद्यार्थीहरूले सांस्कृतिक नृत्य, गीत प्रस्तुत गरेका थिए ।
शनिबार कक्षा ४ देखि १० कक्षासम्मका विद्यार्थीहरुले आ–आफ्नो प्रतिभा प्रस्तुत गरेका थिए ।
तेस्रो दिन आज कक्षा ११ र १२ का विद्यार्थीहरूले प्रतिभा देखाए ।
वार्षिकोत्सवको अवसर पारेर आजै कान्तिपुर कलेजले कक्षा १२ का विद्यार्थीहरूलाई बिदाइ गरेको थियो ।
यसअघि शुक्रबार वार्षिकोत्सव तथा अभिभावक दिवसको औपचारिक कार्यक्रमको उद्घाटन विराटनगर महानगरपालिका प्रमुख नागेश कोइरालाले गरेका थिए ।
