विराटनगर । महाशिवरात्रीको पावन अवसरमा कटहरी र ग्रामथान गाउँपालिकाको सिमानामा अवस्थित श्री बाबा बनसखण्डी मन्दिरमा आयोजित परम्परागत मेलामा यस वर्ष भक्तजनहरूको अत्यधिक भीड देखिएको छ ।
प्रत्येक वर्ष लाग्ने बनसखण्डी मेलामा आसपासका क्षेत्र तथा छिमेकी मुलुक भारतबाट समेत हजारौं श्रद्धालुहरू भगवान् शिवको पूजा–अर्चना गर्न आएका थिए ।
मन्दिरमा भक्तजनहरूले बेलपत्र, दूध, जल अर्पण गरेर शिवजीको आराधना गरेका थिए ।
बनसखण्डी मन्दिरमा आफूले चिताएको मनोकामना पूरा हुने भएकाले दर्शन गर्न आएको पुष्पा दाहाल बताउँछिन् ।
यस्तै, स्थानीय मनिष पहाडी आफूले पढाइका क्रममा राखेको भाकल पूरा भएको कारण बनसखण्डीप्रति आस्था बढ्दै गएको बताउँछन् ।
मेलामा स्थानीय परिकारका साथै विभिन्न सांस्कृतिक कार्यक्रम र भजन कीर्तन गरेर आयोजकले भक्तजनलाई मनोरञ्जन दिलाएको थियो ।
जसमा स्थानीयदेखि भारतका प्रसिद्ध कलाकारहरूले नृत्य–नाटक प्रस्तुत गरेको मेला आयोजक समितिका सदस्य मोहनलाल विश्वास बताउँछन् ।
पछिल्लो १२ वर्षयता भने यस ठाउँमा बृहत् रूपमा मेला लाग्न थालेको हो । अब, यस मेलालाई आगामी वर्षहरूमा थप व्यवस्थित र आकर्षक बनाउने योजनामा रहेको व्यवस्थापन समिति कस्सिएर लागेको छ ।
‘पहिले-पहिले चामल लिएर पूजा गर्न भक्तजन आउँथे,’ मेला व्यवस्थापन समितिका सदस्य गोरेबहादुर मगर भन्छन्, ‘१२ वर्षयता भने टाढा-टाढाबाट मानिसहरू आउने गरेका छन् ।’
श्री बाबा बनसखण्डी मन्दिरको धार्मिक महत्त्व र ऐतिहासिक सम्पदालाई संरक्षण गर्दै धार्मिक पर्यटनलाई प्रवर्द्धन गर्न जरुरी देखिएको छ ।
यसमा स्थानीय सरकारदेखि संघीय सरकारसम्मले चासो लिनुपर्ने देखिएको मेला संयोजक शिवकुमार कार्कीको भनाइ छ ।
शिवरात्रीका अलाबा यहाँ प्रत्येक साउनको अन्तिम सोमबार मेला लाग्ने गरेको यस मेलामा आफ्नो मनोकामना पूरा हुने अपेक्षामा लाखौं भक्तजन सहभागी हुने गरेका छन् ।
तर, मेला लगाउन पर्याप्त ठाउँ तथा खर्च नहुँदा व्यवस्थापन समितिलाई भेटी संकलन गर्नुपर्ने बाध्यता छ । स्थानीय सरकारले यस विषयमा चासो दिएमा धार्मिक पयर्टन भित्रिनेमा दुई मत छैन ।
