विराटनगर । कोशी प्रदेश खेलकुद विकास बोर्डको आयोजनामा जारी प्रथम कोशी प्रदेश खेलकुद महोत्सव- २०८१ को दोस्रो दिन प्रदेशस्तरीय पुरुष कबड्डी प्रतियोगिताको उपाधि मोरङ जिल्लाले हात पारेको छ ।
विराटनगरस्थित दिल्ली पब्लिक स्कुलको मैदानमा बुधबार भएको स्पर्धामा झापाको टोलीलाई पराजित गर्दै मोरङले उपाधि हात पारेको हो ।
मोरङले झापाको २० अंकका विरुद्ध ३१ अंक हासिल गर्दै प्रतियोगिताको उपाधि आफ्नो पक्षमा पारेको हो ।
कोशी प्रदेशका १३ टिमको सहभागिता रहेको प्रतियोगितामा मोरङले उपाधि सँगै ट्रफी, मेडल र एक लाख नगद पुरस्कार प्राप्त गरेको छ ।
झापाले उपविजेताको ट्रफी, मेडल र ५० हजार नगद पुरस्कारमा चित्त बुझाएको छ ।
मोरङले सेमिफाइनलमा सोलुखुम्बुलाई हराउँदै फाइनलमा स्थान बनाएको थियो भने झापाले ताप्लेजुङलाई हराएर उपाधिनजिक स्थान पक्का गरेको थियो ।
तेस्रो भएको सोलुखुम्बु र चौथो ताप्लेजुङले पनि ट्रफी र मेडल प्राप्त गरेका थिए ।
उनीहरूलाई कोशी प्रदेश खेलकुद विकास बोर्डका सदस्यसचिव कृष्ण बस्नेत ‘पर्शुराम’, वडा प्रहरी कार्यालय विराटनगरका डिएसपी बुद्ध श्रेष्ठ, कबड्डीका संयोजक रितेश श्रेष्ठलगायतले ट्रफी, मेडल र नगद पुरस्कार प्रदान गरेका थिए ।
