विराटनगर । खोटाङमा आरोप पुष्टि नभई प्रहरीले हत्कडी लगाएको भन्दै बलात्कारका आरोपितले आत्महत्या गरेका छन् ।
खोटाङको हलेसी तुवाचुङ नगरपालिका-१० अर्खौले ढाँडगाउँका १९ वर्षीय राम परियारले झुन्डिएर आत्महत्या गरेका हुन् ।
बलात्कार मुद्दाको आरोप पुष्टि नभइ प्रहरीले हत्कडी लगाएर सम्मानपूर्वक बाँच्न पाउने अधिकार खोसेको भन्दै उनले आत्महत्या गरेका हुन् ।
२६ वर्षीया महिलाले आरोपितले बलात्कार गरेको आरोपमा माघ २४ गते जिल्ला प्रहरी कार्यालयमा उजुरी दिएकी थिइन् ।
गत वैशाख १० गते बलात्कार गरेको भन्दै महिलाको उजुरी परेको थियो ।
घटनामा प्रहरीले सत्यतथ्य नबुझी निर्दोषलाई हत्कडी लगाएर समाजमा बेइज्जत गरेका कारण माघ २५ गते आत्महत्या गर्न बाध्य भएको भन्दै राम परियाले झुण्डिएर आत्महत्या गरेका हुन् ।
राम परियार(मृतक) को भन्दा तल्लो घरमा ०८१ माघ २४ बाबुछोराको झगडा भएको र सो झगडाका लागि प्रहरी चौकी अर्खौंले माघ २५ गते छलफलका लागि गाउँका मान्छे बोलाएका थिए ।
सोही क्रममा प्रहरीले भेला भएका मध्ये राम परियार को हुनुहुन्छ भनेर सोधीखोजी गर्दा रामले किन ? भनेर प्रश्न गरेपछि भेला भएकामध्ये कसैले दिएको इसारामा प्रहरीले राम परियारलाई हत्कडी लगाएको थियो ।
त्यसपछि सो घटना भएको वडा सदस्य किशोरकुमार श्रेष्ठको भनाइ छ ।
अरूले दिएको इसारामा रामलाई प्रहरीले तत्काल हत्कडी लगाएको र सबैले सोधीखोजी गर्दा, पक्राउ पूर्जी खोजी गरेपछि प्रहरीले हत्कडी फुकालेर लिखित जमानीमा रामका बाबुलाई छोरा जिल्ला लगाएको वडा सदस्य श्रेष्ठले बताए ।
रामले प्रहरीले पुष्टि नभइ हत्कडी लगाएर बेइज्जत गरेको भन्दै प्रहरी चौकी अर्खौँलेका असइ पोषराज कार्कीसँग जवाफ मागेपछि भेला भएकाहरूले रामलाई सम्झाइ बुझाइ घर फर्काएको वडा सदस्य श्रेष्ठले बताए ।
घटना भएको रात माघ २४ गते मध्यरातसम्म राम परिवारसँग भएको र माघ २५ गते बिहान रामको शव झुण्डिएको अवस्थामा हलेसी तुवाचुङ नगरपालिका १० अर्खौँले ढाँडगाउँमा भीमसेनपातीको रुखमा फेला परेको थियो ।
घटनास्थलमा फेला परेको सुसाइड नोटमा प्रहरी चौकी अर्खौँलेका असइ पोषराज कार्कीले आरोप पुष्टि नभइ हत्कडी लगाएर समाजमा बेइज्जत गरेको, सम्मानपूर्वक बाँच्न नदिएको कुरा उल्लेख छ ।
स्थानीयले असइ कार्कीविरुद्ध चर्को दबाव दिएपछि प्रहरीले कार्कीको असइको जिम्मेवारी खोसेको छ ।
घटनाका विषयमा थप अनुसन्धान थालिएको र असइको जिम्मेवारी खोसेर जिल्ला झिकाइ आन्तरिक रूपमा छानबिन थालिएको जिल्ला प्रहरी कार्यालयका डिएसपी प्रतिक विष्टले बताए ।
शवको पोष्टमार्टम जिल्ला अस्पतालमा माघ २५ गते गरी सोही दिन पीडित पक्षले शव बुझी सद्गत गरेको छ ।
