काठमाडौं । काठमाडौंको दक्षिणकाली नगरपालिका–३ भन्ज्याङको जुनकिरी इंग्लिस बोर्डिङ स्कुलका विद्यार्थी सवार बस दुर्घटना हुँदा दुई जनाको मृत्यु भएको छ ।
खेलकुद सप्ताह सकेर विद्यालयको बस विद्यार्थी छोड्न फर्पिङतर्फ जानेक्रममा भएको उक्त दुर्घटनामा बच चालक र एक विद्यार्थीको मृत्यु भएको छ भने ४५ जना घाइते भएका छन् ।
आइतबार विद्यालयबाट छुटेको केही मिनेटमै जुनकिरी इंग्लिस बोर्डिङको बा१क ५६६४ नम्बरको बस दुर्घटना भएको थियो ।
बस सडकबाट १ सय ५० मिटर तल डल्लु खोलामा खसेको प्रहरीले जानकारी दिएको छ ।
दुर्घटनामा ३५ वर्षीय चालक राधाकृष्ण मगर र आठ वर्षका विपिन श्रेष्ठको उपचारका क्रममा मृत्यु भएको हो ।
यसैगरी, घाइतेको मनमोहन अस्पताल फर्पिङ, कीर्तिपुर अस्पताल, ट्रमा सेन्टर, मेडिसिटी अस्पताल, दक्षिणकाली नगर अस्पताल, वयोधा अस्पताल, सहिद मेमोरियल अस्पताल, नर्भिक अस्पताल, स्टार अस्पतालमा उपचार भइरहेको छ ।
बसमा प्लेग्रुपदेखि कक्षा ६ सम्मका विद्यार्थी र शिक्षक सवार थिए । दुर्घटनाको कारणबारे अनुसन्धान जारी रहेको प्रहरीले बताएको छ ।
