विराटनगर । मोरङको ग्रामथान गाउँपालिका-२ झोराहाटस्थित शारदा सेकेन्डरी बोर्डिङ स्कुलले आफ्नो वार्षिकोत्सव मनाएको छ ।
सरस्वती पूजाको दिन सोमबार स्कुल परिसरमा विविध कार्यक्रमको आयोजना गर्दै विद्यालयले १८औं वार्षिकोत्सव तथा अभिभावक दिवस मनाएको हो ।
ग्रामथान गाउँपालिकाका अध्यक्ष नमोनारायण माझीको प्रमुख आतिथ्यतामा सम्पन्न कार्यक्रममा सांगीतिक र साँस्कृतिक कार्यक्रमको आयोजनासमेत गरिएको थियो ।
जसमा कक्षा ५ मा पढ्ने सृष्टि माझीले प्रस्तुत गरेको गीत मन पराएर स्कुल समितिका श्यामसुन्दर यादव, समीर खतिवडा र नरेश न्यौपानेले एक हजार रुपैयाँ प्रदान गरेका थिए ।
त्यसैगरी, स्कुलले अतिरिक्त क्रियाकलापमा प्रथम, द्वितीय, तृतीय स्थान ल्याउने विद्यार्थीहरूलाई मायाको चिनो र नगद पुरस्कार प्रदान गरेको थियो ।
यस्तै, २०८० मा राम्रो अंक ल्याउने छात्र/छात्रालाई मायाको चिनो र नगद पुरस्कारले सम्मान गरिएको थियो ।
कार्यक्रममा ग्रामथान गाउँपालिकाका शिक्षा शाखा अधिकृत भीमप्रसाद न्यौपाने, वडा नम्बर २ का अध्यक्ष यादव खतिवडा, अभिभापक तथा शिक्षक-शिक्षिकाको उपस्तिथि थियो ।
स्कुलका प्रिन्सिपल सञ्जयकुमार मण्डलले स्कुलले प्रत्येक वर्ष गर्दै आइरहेको क्रियाकलापबारे बेलिबिस्तार लगाएका थिए ।
स्कुलका विद्यार्थीहरूले २०६९ सालदेखि नै एसएलसी हुँदै एसइईमा अहिलेसम्म सर्वोत्कृष्ट अंक ल्याइरहेको उनको भनाइ छ ।
किताबी ज्ञानसँगै नृत्य, स्पिच, खेलकुद, संगीतलगायत अतिरिक्त क्रियाकलापमा पनि उत्कृष्ट रहेको बताएका छन् ।
शारदाकै विद्यार्थी सुमिका सरदार राष्ट्रियस्तरका गायिका भइसकेको बताउँदै उनले यसै स्कुलमा पढेका विद्यार्थीहरू डाक्टर, इन्जिनियर, स्कुल पढाउने शिक्षक भइसकेको स्मरण गराएका छन् ।
ग्रामथान गाउँपालिका अध्यक्ष माझीले गाउँपालिकाले यस वर्ष सामुदायिक स्कुलका कक्षा १० मा पढ्ने एसइई दिने विद्यार्थीहरूलाई निःशुल्क कोचिङको व्यवस्था गरेको बताए ।
यसैगरी, स्कुलका भाइस प्रिन्सिपल उमेश लुइँटेलले ग्रामथान गाउँपालिकासहित सबैको साथ-सहयोग पाए स्कुललाई छिट्टै नै १२ कक्षासम्म सञ्चालन गर्ने सुनाए ।
साथै, आज विद्यार्थीहरूले स्कुल परिसर राखिएको शिक्षाकी देवी सरस्वती मन्दिरमा पूजा-अर्चना गरी उनको महिमा गाएका थिए ।
सरस्वती पूजाका दिन साना बालबालिकालाई अक्षर चिनाउने परम्परा रहँदै आएको छ । सोही अवसरमा नयाँ शैक्षिक सत्रको शुभारम्भ गर्दै बालबालिकाहरूले अक्षराम्भसमेत गरेका थिए ।
कार्यक्रममा स्थानीय शिक्षक, विद्यार्थी र अभिभावकहरूको उत्साहपूर्ण सहभागिता रहेको थियो ।
