विराटनगर । नेकपा एमालेका नेता जीवन घिमिरेको पहिलो कृति ‘कमरेड हिजो र आज’ को आज विराटनगरमा लोकार्पण गरिएको छ ।
प्रतिनिधिसभाका सभामुख देवराज घिमिरेले शनिबार विराटनगरको होटल मनास्लुमा एक कार्यक्रमका बीच पुस्तक सार्वजनिक गरे ।
कार्यक्रममा उनले पुस्तकले इतिहासलाई सम्झाउने काम गरेको बताए ।
प्रगतिशील लेखक संघ मोरङले आयोजना गरेको कार्यक्रममा पुस्तक विमोचन तथा पुस्तकका पात्रहरूलाई सम्मान कार्यक्रममा उनले पुस्तकले हिजोलाई फर्केर हेर्ने काम भएको बताए ।
पुस्तकका माध्यमबाट भोलि गर्ने काम पनि देखाइएको सभामुख घिमिरेको भनाइ छ ।
उनले मुलुकमा निरङ्कुशतालाई अन्त्य गरी लोकतन्त्रको स्थापनाका यस क्षेत्रका जनता, दलका नेता एवम् कार्यकर्ताको महत्वपूर्ण भूमिका रहेको बताए ।
नेकपा एमालेकी उपाध्यक्ष एवम् वागमती प्रदेशका पूर्वमुख्यमन्त्री अष्टलक्ष्मी शाक्यले सङ्घीय गणतन्त्रलाईलाई बलियो बनाउ इतिहासको भूमिका रहने बताइन् ।
उनले अब आफ्नो बाँकी जीवन जनताको समृद्धि र पार्टीको संगठन सुदृढीकरणमा लाग्ने जानकारी दिइन् ।
लेखक एवम् नेकपा एमाले केन्द्रीय सदस्य जीवन घिमिरेले प्रजातन्त्र र लोकतन्त्र स्थापनाका लागि लागेको आन्दोलनमा झापा, मोरङ र सुनसरी जिल्लामा आफूसँग सम्बन्ध जोडिएका चार सय पात्रहरूको विवरण पुस्तकमा समावेश गरिएको बताए ।
कार्यक्रममा चन्द्र भण्डारी, निर्मला कोइराला, प्राडा रमेशप्रसाद भट्टराई, विमला दाहाल घिमिरेले पुस्तकको समीक्षा गरेका थिए ।
सोही अवसरमा सभामुख घिमिरेले नेकपा एमालेका उपाध्यक्ष शाक्यसहित १२ जना पुस्तकका मुख्य पात्रहरुलाई सम्मानित गरे ।
कार्यक्रममा विराटनगर-१ की माधवी रिमाल, रामप्रसाद देवकोटा, हर्क चुम्वे, स्व.रमाप्रसाद रिजाल, कुमार निरौला, लक्ष्मीप्रसाद उप्रेती, राधादेवी कामत, नारायणप्रसाद आचार्य, तारानाथ घिमिरे र मोहनकुमारी घिमिरेलाई पनि सम्मान गरेको छ ।
एमाले केन्द्रीय सदस्य तथा कोशी प्रदेशका पूर्वमन्त्री घिमिरेले वि.सं २०३६–०४६ सम्मको आन्दोलनलाई समेटेर पुस्तक तयार गरेका हुन् ।
पार्टी राजनीतिकसँग जोडिएका घटनाहरू, सो घटनामा संलग्न करिब ४ सय पात्रहरूका विषयहरू पुस्तकमा समेटिएको छ ।
२०३६–०४६ आन्दोलनका समयका पात्रहरूका बारेमा थेसिस गर्न चाहनेहरूका लागि पुस्तक उपयोगी स्रोत हुने लेखक घिमिरेको भनाइ छ ।
