विराटनगर । झापाको दमक नगरपालिका-४ ताराबारीचोक निर्माणाधीन एसियन हाइवेमा जेसिबीको बकेटबाट खसेर एक युवकको मृत्यु भएको छ ।
जेबी टुण्डी कन्स्ट्रक्सनको जेसिबीको बकेटमा चढेका हाइवेमा काम गर्ने कामदार रौतहट चन्द्रनिगाहापुर-१० घर भएका २० वर्षीय संजय महत्तो केवलको तार जोड्ने क्रममा खसेका थिए ।
जेसिबीको बकेटबाट खसेर गम्भीर घाइते बनेका उनलाई उपचारका लागि अरनिको हस्पिटल उर्लाबारी पठाइएको थियो ।
अरनिको अस्पतालका डाक्टरले चेकजाँच गर्दा करेन्ट लागेर घाइते भएको ठम्याएपछि उनलाई थप उपचारका लागि विराटनगरस्थित नोबेल अस्पताल ल्याइएको थियो ।
नोबेल अस्पतालमा उपचारको क्रममा अपराह्न ४:३६ बजेतिर मृत्यु भएको हो ।
प्रहरीले जेसिबी र जेसिबी चालक मोरङको उर्लाबारी नगरपालिका-६ बस्ने अन्दाजी ५६ वर्षीष शिवकुमार श्रेष्ठलाई नियन्त्रणमा लिएको छ ।
अस्थायी प्रहरी चौकी ताराबारीको नियन्त्रणमा रहेका चालक श्रेष्ठसँग लाइसेन्स पनि नभएको खुलेको छ ।
