विराटनगर । आज बिहानै काठमाडौं र पूर्व क्षेत्रमा भूकम्पको धक्का महसुस गरिएको छ ।
बिहान ६ बजेर ५१ मिनेटमा भूकम्पको धक्का महसुस गरिएको हो ।
धक्का विराटनगरमा पनि महसुस भएको छ । भुकम्पको धक्कापछि मानिसहरू हो-हल्ला गर्दै घरबाहिर निस्किएका थिए ।
राष्ट्रिय भूकम्प मापन केन्द्रका अनुसार भूकम्प ७ रेक्टर स्केलको मापन भएको छ । भूकम्पको केन्द्रविन्दु नेपाल-चीन सीमाना तिप्बतको दिंगे कान्टीमा रहेको पुष्टि भएको छ ।
काठमाडौंसहित धादिङ, सिन्धुपाल्चोक, काभ्रे, मकवानपुरलगायत पुर्बी नेपालमा जिल्लामा समेत धक्का महसुस गरिएको थियो ।
भूकम्पपछि प्रधानमन्त्री केपी शर्मा ओलीले पछिल्लो समय नेपालका विभिन्न भागमा महसुस गरिएका भूकम्पीय धक्काप्रति सतर्क रहन नागरिकलाई आग्रह गरेका छन् ।
आज बिहान सामाजिक सञ्जाल फेसबुकमार्फत प्रधानमन्त्री ओलीले नेपालका विभिन्न स्थानमा सानाठूला भूकम्पका धक्का आइरहेको जानकारी दिँदै सर्वसाधारणलाई सतर्क र सुरक्षित रहन आग्रह गरेका हुन् ।
‘हिजोआज विभिन्न भागमा सानाठूला भूकम्पका धक्का आइरहेका छन् । सबै सतर्क रहनु होला, सुरक्षित रहनु होला ।’ प्रधानमन्त्री ओलीले फेसबुकमा लेखेका छन् ।
