विराटनगर । विराटनगर महानगरपालिका-१४ स्थित डिग्री कलेजको खेल मैदानमा आठौं संस्करणको विराट एक्स्पो हुने भएको छ ।
उद्योग संगठन मोरङको आयोजनामा आगामी माघ ११ गतेदेखि औद्योगिक एवम् व्यापारिक महोत्सव विराट एक्स्पो-२०२५ हुन आँटेको हो ।
आयोजक उद्योग संगठन मोरङले सोमबार पत्रकार सम्मेलन गर्दै माघ ११ देखि १० दिनसम्म अर्थात् माघ २० गतेसम्म एक्स्पो हुने जानकारी दिएको छ ।
उसले एक्स्पोको तयारीसमेत तीव्रस्तरमा थालिएको जनाएको छ । करिब दुई करोड लगानीमा खरिद गरिएको तीनवटा ‘डोम’ प्रयोग गरेर एक्स्पो आयोजना हुने उद्योग संगठनका अध्यक्ष राकेश सुरानाले जानकारी दिए ।
उद्योग संगठन मोरङले पहिलोपटक एक्स्पोमा डोमको उपयोग गर्न लागेको हो ।
एक्स्पो सञ्चालनका लागि करिब ३ करोड खर्च हुने अनुमान गरिएको बताउँदै सुरानाले नयाँ उद्यमीलाई प्रोत्साहन गर्ने उद्देश्यले एक्स्पो आयोजना गर्न लागिएको सुनाए ।
‘डिजिटल कोशी बिल्डिङ इनोभेसन एन्ड इन्भेस्टमेन्ट’ नाराका साथ सञ्चालन हुने एक्स्पोमा दुई सय ६८ वटा स्टलहरु रहनेछन् ।
एक्स्पोमा ९ पेभिलियनमा विराट बजार बिटुबीको १२ वटा, स्टार्टअप भिजन कोशी ह्याकाथुनको १२ वटा, रोजगार कोशीका लागि १२ वटा, व्यावसायिक सेवा प्रदायकको ४० वटा, अटोमोवाइल्सका २० वटा, औद्योगिक क्षेत्रका ७५ वटा, औद्योगिक, कर्पोरेट र कृषिका ७५ वटा स्टल रहनेछन् ।
एक्स्पोमा रोजगारीका लागि तालिम पनि दिने बताइएको छ ।
एक्स्पोमा स्टार्टअफ कन्फ्रेन्स, रोजगार कोशी, इनर्जी इफिसियन्सी, ‘मेरो देश, मेरो उत्पादन’लगायत कार्यक्रम आयोजना गरिने विराट एक्स्पो २०२५ व्यवस्थापन समिति संयोजक भोलेश्वर दुलालले जानकारी दिए ।
