विराटनगर । मोरङको बूढीगंगा गाउँपालिका-४ मनमोहनचोकमा मोटरसाइकल दुर्घटना हुँदा एक किशोर घाइते भएका छन् ।
आइतबार दिउँसो १:२५ बजेतिर मनमोहनचोकस्थित भित्री सडकखण्डमा नेमुवाबाट हात्तिमुडातर्फ जाँदै गरेको प्रदेश १-०२-०४१ प ३४४५ नम्बरको मोटरसाइकल आफैं अनियन्त्रित भई दुर्घटना भएको थियो ।
उक्त दुर्घटनामा मोटरसाइकल चालक स्थानीय सुखन माझीका छोरा १७ वर्षीय सुदीपकुमार माझीको दाहिने खुट्टा र शरीरका अन्य भागमा चोट लागेको हो ।
उनलाई उपचारको लागि विराट टिचिङ अस्पताल गंगाचोक पठाइएको छ । उनको अवस्था सामान्य रहेको प्रहरीले जनाएको छ ।
दुर्घटनामा परेको मोटरसाइकल नियन्त्रणमा लिई इलाका प्रहरी कार्यालय नेमुवामा राखिएको छ ।
सुदीपले मादक पदार्थ सेवन नगरे पनि सवारी चालक अनुमतिपत्र प्राप्त नगरी मोटरसाइकल चलाउँदा दुर्घटना भएको प्रहरीको प्रारम्भिक अनुसन्धानले औंल्याएको छ ।
