विराटनगर । काठमाडौं महानगरपालिकाका प्रमुख बालेन्द्र शाह ‘बालेन’ ले शुक्रबार प्रथम कोटेश्वर महोत्सवमा जम्मा ३ मिनेट ३५ सेकेन्ड बोले ।
त्यति समय त प्रदेशका मन्त्री, मुख्यमन्त्री र प्रधानमन्त्री स्वयमले पनि ‘मेरा फलाना मित्र, मेरा फलाना बालसखा’ भन्दै सम्बोधनमै बिताउँछन् ।
नेताहरूले दर्शक–स्रोता र माइक पाए भने भाषण गर्दा घण्टौं बिताइदिन्छन् भन्ने उक्तिलाई गलत साबित गर्दै बालेनले छोटो मिठो अभिव्यक्ति दिए ।
कोटेश्वर महोत्सव उद्घाटन कार्यक्रमका लागि प्रमुख अतिथिका रूपमा त्यहाँ पुगेका बालेनले छोटो समय बोल्दा पनि समाचारमा भने धमाकाका साथ छाए ।
बालेनले तीनकुने जग्गाको मुआब्जा वितरण गर्न सरकारसँग आग्रह गरे ।
तीनकुनेको जग्गाको मुआब्जा वितरण आफ्नो उमेरभन्दा बढी समयसम्म पनि वितरण नगरिनु दुःखद् रहेको उनको भनाइ छ ।
अहिले दुई तिहाईको सरकार रहेको भन्दै अहिलेको सरकारले चाहे मुआब्जा वितरणमा कुनै समस्या नहुने उनको जिकिर गरे ।
उनले त्यसका लागि जग्गाधनीहरुले स्थानीय सरकार र संघ सरकारलाई दबाब दिन सुझाव दिए ।
उनले उक्त जग्गा सरकारले लुटेर राखेको र प्रक्रिया अघि बढिरहेको कुनैपनि नेताले भनेको खण्डमा नपत्याउन आग्रह गरे ।
अहिलेको सरकारले पनि मुआब्जा नदिए कहिल्यै नदिने उनको दाबी छ ।
