विराटनगर । कोशी प्रदेशका भौतिक पूर्वाधार विकास मन्त्री भूपेन्द्र राईले एक सय दिने उपलब्धि सार्वजनिक गरेका छन् ।
आइतबार उनले मन्त्रालयमा पत्रकार सम्मेलन गरी आफ्नो एक सय दिने कार्य प्रगति सार्वजनिक गरेका हुन् ।
राईले आफू मन्त्री भएपछि नदी तथा खोलाहरूमा रहेका झोलुंगे पुलहरू नजिक पक्की पुल निर्माण भई प्रयोगविहीन तथा जीर्ण भएका झोलुंगे पुलहरू स्थानान्तरण गर्ने निर्णय भएको बताए ।
यसैगरी विपदबाट भएको क्षतिको विवरण संकलन गरिएको, कोशी रिफ्रेसमेन्ट सेन्टर निर्माणका लागि निजी क्षेत्रलाई दिने गरी लगानी सम्मेलनको आयोजना सोकेसमा राख्ने लगायतका कार्यलाई जोड दिएको बताए ।
उनले स्थलगत सडक निर्माण अनुगमनदेखि पुल स्थानान्तरणसम्मको कार्यलाई प्रगतिको रुपमा राखेका छन् ।
‘मैले एकसय दिनमा सकेको जतिको काम प्रस्तुत गरेको हुँ । अब प्रदेश समुन्नत गर्न बाँकी नै छ । मन्त्री भएपछि नदी तथा खोलाहरूमा रहेका झोलुंगे पुल जिक पक्की पुल निर्माण भई प्रयोगविहीन तथा जीर्ण भएका झोलुंगे पुलहरू स्थानान्तरण गर्ने निर्णय भएको छ । हामीबीच असोजमा गएको विपद्को क्षतिको विवरण ठूलो छ । कोशी रिफ्रेसमेन्ट निर्माणलाई अघि बढाउन निजी क्षेत्रको सहयोग र लगानी सम्मेलनको तयारीमा छौँ ।’
पत्रकार सम्मेलनमा उनले विपद्बाट समग्रमा ४ अर्ब ६३ करोड रुपैयाँ बराबरको क्षति भएको जानकारी दिए । उनका अनुसार विपद्का कारण क्षति भएका पहाडी क्षेत्रका सडक, पुल, झोलुंगे पुलको विवरण संकलन गरिएको हो ।
उनले भने, ‘असोज १० गते गएको भीषण वर्षाले झापाको बिरिङ खोला पक्की पुल, पाँचथरको हेवा खोला र फेमे खोला पक्की पुल, खोटाङ र उदयपुर जोड्ने दुधकोशी फोक्सिंङटार पक्की पुल, धाप्लांगघाट, बन्सिलाघाटलगायतका स्थानको निरीक्षण गरियो । भौतिक संरचनामा धेरै क्षति भएको छ ।’
पत्रकार सम्मेलनमा मन्त्री राईले प्रादेशिक सडक सञ्जाल सूची तयार पारेको बताए । जसमा प्रादेशिक सहायक लोकमार्गअन्तर्गत ९६ वटा सडक र प्रादेशिक मार्गअन्तर्गत २ सय ८९ वटा सडक पहिचान गरिएको छ ।
यस्तै, उनले कोशी प्रदेशको बजेट पुनरवलोकनको सम्भावना नरहेको पनि उल्लेख गरेका छन् । बजेट कार्वान्वयनमा अघि बढिसकेको हुँदा पुनरवलोकन हुने सम्भावना नभएको उनको भनाइ छ ।
प्रदेशको बजेट पुनरवलोकनका लागि सत्तामा रहेका दुई दलबीचको संयन्त्रले निर्णय गरेको थियो ।
दुई दलीय संयन्त्रको बैठकले कोशी प्रदेशको चालु आर्थिक वर्षको बजेट पुनरवलोकनका लागि प्रदेश सरकारलाई निर्देशनसमेत दिएको थियो ।
