काठमाडौं । राष्ट्रिय स्वतन्त्र पार्टी (रास्वपा) बाट उम्मेदवारी दिएर वडाध्यक्ष बनेकी रोजिना श्रेष्ठलाई काठमाडौं महानगरपालिका प्रमुख बालेन्द्र साह (बालेन) ले पद तथा गोपनीयताको शपथ गराएका छन् ।
काठमाडौं-१६ को वडाध्यक्ष पदमा निर्वाचित श्रेष्ठलाई मंगलबार प्रमुख साहले महानगरपालिकाको कार्यकक्षमा आयोजित कार्यक्रममा शपथ गराएका हुन् ।
यही मङ्सिर १६ गते सम्पन्न स्थानीय तहको उपनिर्वाचनमा उनी निर्वाचित बनेकी थिइन् ।
काठमाडौंको ठमेल, नयाँबजार, बालाजु क्षेत्र समेटिएको उक्त वडाको २१ हजार २५ मतदातामध्ये १० हजार ३७६ मत सदर भएको थियो ।
जसमा श्रेष्ठले दुई हजार ९०२ मत प्राप्त गरी अध्यक्ष पदमा निर्वाचित भएकी हुन् ।
शपथ ग्रहण कार्यक्रममा उपप्रमुख सुनिता डङ्गोल, प्रवक्ता नवीन मानन्धर, प्रमुख प्रशासकीय अधिकृत सरोज गुरागाईँसहित अधिकारी उपस्थित थिए।
