विराटनगर । मोरङको बूढीगंगा गाउँपालिकामा बुधबारदेखि गाउँपालिकास्तरीय छैटौं राष्ट्रपति रनिङ सिल्ड प्रतियोगिता र तेस्रो बृहत् प्रतिभा पहिचान कार्यक्रम सुरु भएको छ ।
बूढीगंगा-१ नरग्राम नमुना माध्यमिक विद्यालयको प्रांगणमा युवा तथा खेलकुद मन्त्री तेजुलाल चौधरी, पूर्वमन्त्री डिगबहादुर लिम्बू र कोशी प्रदेशका पूर्वमुख्यमन्त्री केदार कार्कीले उक्त प्रतियोगिताको उद्घाटन गरे ।
पालिकाको आयोजनामा आजदेखि मंसिर १५ गतेसम्म हुने प्रतियोगितामा बूढीगंगाका सामुदायिक र संस्थागततर्फका ३५ वटा विद्यालयका ८०० विद्यार्थीहरूले सहभागिता जनाउने छन् ।
खेलकुदतर्फ भलिबल, कबड्डी, कराते र एथलेटिक्समा स्पर्धा हुने छ भने चित्रकला, वक्तित्वकला, गायन र नृत्य विधामा स्पर्धा हुने छ ।
यो वर्षको राष्ट्रपति रनिङ सिल्ड प्रतियोगिता गराउने जिम्मेवारी नरग्राम माध्यमिक विद्यालयले पाएको छ ।
प्रतियोगिता आगामी मङ्सिर १५ गतेसम्म हुने नरग्राम माध्यमिक विद्यालयका प्रधानाध्यापक कैलाश केसीले जानकारी दिए ।
प्रतिभा पहिचान अन्तरगतको कक्षा ६–८ हाम्रो संस्कृति हाम्रो पहिचान विषयमा वक्तृत्वकला र कक्षा ९–१२ लोक तथा आधुनिक गायन प्रतियोगिता पहिलो दिन भएको छ ।
हाम्रो सुन्दर विद्यालय कक्षा १–३ चित्रकला प्रतियोगिता, प्रतिभा पहिचानअन्तर्गतकै कक्षा ४–५ लोक नृत्य प्रतियोगिता बुधबार हुने आयोजक बुढीगंगा गाउँपालिकाका शिक्षा अधिकृत लक्ष्मी न्यौपानेले जानकारी दिइन् ।
खेलकुद प्रतियोगिताहरूमा भलिबल, कबड्डी, दौड ट्र्याक तर्फ, उफ्रने र फ्याँक्ने फिल्ड तर्फ र कराते हुनेछ । खेलहरू जनप्रिय माध्यमिक विद्यालय बाँसबारीमा हुने छ ।
प्रतिभा पहिचानका कार्यक्रमहरू नरग्राम माध्यमिक विद्यालयमा र खेलकुदका सबै प्रतियोगिताहरू जनप्रिय माध्यमिक विद्यालयमा हुने तथा पुरस्कार वितरण नरग्राम माविमा गर्ने कार्यक्रम तालिका रहेको गाउँपालिकाका अध्यक्ष जीतनारायण थापाले जानकारी दिए ।
पालिका आफैँले खेलकुदका कार्यक्रम गर्न बजेट विनियोजन गरेको उनले बताए ।
कुलतमा फस्दै गएका बालबालिका विद्यालयसम्म ल्याउन र खेलकुद प्रति आकर्षित गर्नको लागि अहिले २०० आर्थिक अवस्था कमजोर भएका विपन्न र दलित बालबालिकालाई कराँते प्रशिक्षणमा राखेको गाउँपालिकाले जनाएको छ । कार्यक्रमपछि उनीहरू विद्यालय नियमित आउन थालेको समेत थापाले जानकारी दिए ।
उपाध्यक्ष अमृताकुमारी गच्छदारले २०७५ देखि चुनौती र कठिनाइका बाबजुद पनि प्रतियोगिता गरिरहेको सुनाइन् ।
प्रदेश र संघीय सरकारले बजेट नदिएको परिस्थितिमा पनि तीन वर्षदेखि प्रतिभा पहिचान कार्यक्रम गरिरहेको उनको भनाइ छ ।
मोरङ व्यापार संघका पूर्वअध्यक्ष नवीन रिजालले विद्यार्थीहरूलाई हारबाट नआत्तिन आग्रह गर्दै जित र हारभन्दा पनि प्रतियोगितामा सहभागी हुनु नै ठुलो कुरा भएको सुनाए ।
कोशी प्रदेशका पूर्वमुख्यमन्त्री केदार कार्कीले शिक्षामा विभेद भइरहेको बताउँदै उक्त विभेद हटाउन सबै लाग्नुपर्ने सुनाए । कक्षाकोठा ज्ञानको तुलनामा बाहिरी ज्ञानले पनि विद्यार्थीको भविष्य उज्ज्वल हुने उनले बताए ।
पूर्वयुवा तथा खेलकुद मन्त्री डिगबहादुर बस्नेतले राष्ट्रपति रनिङ सिल्डका लागि बजेट छुट्याउनुपर्ने औंल्याए । आफ्नो कार्यकालमा बजेट छुट्याउन नपाएको र वर्तमान मन्त्रीले पनि छुट्याउन नपाएको उनको भनाइ छ ।
यस्तै, मन्त्री चौधरीले राष्ट्रपति रनिङ सिल्डमा सहभागी विद्यार्थीहरूलाई आउँदो राष्ट्रिय खेलकुदमा सहभागी हुन आग्रह गरे । विद्यालय र खेलकुद अन्तरसम्बन्धित हुने बताउँदै विद्यार्थीहरूलाई हरेक प्रतिस्पर्धामा सहभागी गराउन शिक्षक र अभिभावकलाई सुझाव दिए ।
नेपालमा अहिले भलिबल लिग र एनपिएल जस्ता अन्तर्राष्ट्रियस्तरको लिगहरू भइरहेको बताउँदै आगामी दिनमा कबड्डीको लिग गराउने योजना रहेको मन्त्री चौधरीको भनाइ छ ।
विद्यार्थीहरूले स्वागत नृत्य गरी आगन्तुकलाई मनोरञ्जन गरेका थिए ।
बूढीगंगा गाउँपालिका अध्यक्ष जितनारायण थापा मगरको अध्यक्षतामा सम्पन्न कार्यक्रममा गाउँपालिकाका प्रमुख प्रशासकीय प्रमुख सन्जीव न्यौपानेलगायतको उपस्थिति रहेको थियो ।
