विराटनगर । मोरङको ग्रामथान गाउँपालिका अध्यक्षका लागि नेकपा एमालेका तुलसीराम विश्वासले मनोनयन दर्ता गराएका छन् ।
एमालेका नेता–कार्यकर्तासहित आइतबार निर्वाचन अधिकृतको कार्यालय पुगेर विश्वासले मनोनयन दर्ता गराएका हुन् ।
३० वैशाख २०७९ को चुनावबाट निर्वाचित नेपाली कांग्रेसका जयप्रकाश गच्छदार थारूको निधनपश्चात ग्रामथानमा उपनिर्वाचन हुन लागेको छ ।
मंसिर १६ गते हुने उपनिर्वाचनका लागि एमालेका प्रत्याशी विश्वासले उम्मेदवारी दर्ता गराएका हुन् ।
मनोनयन दर्तापश्चात सञ्चारकर्मीसँग बोल्दै विश्वासले दुःखले निम्तिएको उपनिर्वाचनबाट निर्वाचित भएर बाँकी कार्यकाल सुशासनसहितको कार्यकाल चलाउनेमा दृढ विश्वास प्रकट गरे ।
साथै उनले ग्रामथान गाउँपालिकामा बेथिति हटाएर ग्राथानबासीका समस्याको निकास दिन सक्नेमा आफू विश्वस्त रहेको सुनाए ।
‘म ग्रामीण परिवेशमा भिजेको मान्छे हुँ, मैले यहाँको समस्यालाई नजिकबाट बुझेको छु,’ उनले भने, ‘ग्रामथान गाउँपालिकाका बेथिति हटाएर ग्रामथानबासीको समस्या निराकरण गर्नमा तल्लीन हुने छु । आशा छ, मतदाताले मलाई जिताउनुहुने छ ।’
तुलसी एमाले ग्रामथान गाउँ कमिटीका उपाध्यक्ष हुन् । ग्रामीण परिवेशमा हुर्किएर विदेशसमेतको अनुभव संगालेका विश्वासले केही दिनयता घरदैलो कार्यक्रम गर्दै मतदाताको सुझाव लिने काम गरिरहेका छन् ।
तुलसीको नेपाली कांग्रेसका बलराम सरदार र नेकपा माओवादी केन्द्रका नमोनारायण माझीसँग कडा प्रतिस्पर्धा हुने आँकलन गरिएको छ । उनीहरूले पनि आजै मनोनयन दर्ता गराइसकेका छन् ।
ग्रामथानको नेतृत्व गर्न एकीकृत समाजवादीले दिलबहादुर विश्वकर्मा र एमाले छोडेका स्वतन्त्र उम्मेदवार नेमनारायण माझीले पनि मनोनयन दर्ता गराएका छन् ।
अब, उम्मेदवारको विरोधमा उजुरी दिन मंसिर ३ गते र उजुरीमाथि छानबिन मंसिर ४ गते गरिने बताइएको छ । उजुरीमाथिको छानबिनपछि उम्मेदवारको नामावली सोही दिन प्रकाशन गरिने भएको छ ।
ग्रामथानमा २६ हजार ४४ मतदाता छन् । संघीयतापछिको पहिलो स्थानीय तहको निर्वाचनमा एमालेका शिवनारायण माझीले ग्रामथानको नेतृत्व गरेका थिए ।
तर, दुई वर्षअघि भएको निर्वाचनमा एमालेका शिवनारायण माझीलाई हराउँदै कांग्रेसका गच्छदार अध्यक्षमा निर्वाचित भएका थिए ।
१० माघ २०८० मा ब्रेन ह्यामरेज भएर थलिएका गच्छदारको गत असार ३ गते निधन भएको थियो । त्यसयता, उपाध्यक्ष गुणावतिदेवी थारूले कार्यबाहक अध्यक्षको जिम्मेवारी सम्हाल्दै आएकी छन् ।
