विराटनगर । मानव तस्करको आरोप लागेका कोशी प्रदेश सरकारका निवर्तमान आन्तरिक मामिला तथा कानुनमन्त्री लिलाबल्लभ अधिकारीलाई काठमाडौं लगिएको छ ।
पूर्वमन्त्री अधिकारी आइतबार दिउँसो विराटनगरस्थित निवासबाटै पक्राउ परेका हुन् ।
मोरङका प्रहरी प्रमुख एसपी नारायण चिमरियासहितको टोलीले पक्राउ गरेको हो ।
निवासबाट विराटनगर विमानस्थल पुर्याइएका उनलाई केहीबेरमै काठमाडौंतर्फ लगिने एसपी चिमरियाले जानकारी दिए ।
पक्राउ परेपछि संक्षिप्त प्रतिक्रिया दिँदै अधिकारीले अनुसन्धानलाई सघाउने बताएका छन् ।
‘कोही मान्छे कानुनभन्दा माथि हुँदैन, यसैले अनुसन्धानमा सघाएको हुँ र आगामी दिनमा पनि सहयोग गर्छु,’ उनले भने ।
मानव तस्करीको आरोप लागेका अधिकारी आइतबार अदालतबाट अनुमति लिएपछि पक्राउ परेका हुन् ।
मानव तस्कर गिरोहसँग मिलेमतो खुलिसक्दा पनि अधिकारीमाथि अनुसन्धान सुरू नभएको भन्दै गृह प्रशासनको आलोचना भइरहेको थियो ।
पूर्वमन्त्री अधिकारीलाई मानव तस्करीको आरोप लागेको छ ।
मन्त्रिपरिषदबाट भ्रमण स्वीकृत नगराई उनी जापान गएका थिए ।
उनीसँगै अन्य तीन जना व्यक्ति पनि जापान गएका थिए ।
तर जापानको अध्यागमनले उनलाई विमानस्थलबाट फर्काइदिएको थियो ।
स्वदेश फर्किएर उनले गत बुधबार पत्रकार सम्मेलन गरी राजीनामा दिएका थिए ।
