विराटनगर । प्रख्यात लोकगायिका शारदा सिन्हाको सम्मानमा श्रद्धाञ्जलीसभा सम्पन्न भएको छ ।
नागरिक मिडिया प्रालिद्वारा सञ्चालित नागरिक एफएमले शुक्रबार श्रद्धाञ्जलीसभाको आयोजना गरेको हो ।
नागरिक मिडियाका प्रबन्ध निर्देशक एवम् पत्रकार अरविन्द मेहताको अध्यक्षतामा भएको श्रद्धाञ्जलीसभामा गायिका सिन्हालाई भावपूर्ण श्रद्धासुमन अर्पण गरिएको थियो ।
श्रद्धाञ्जली सभामा सहभागी सबैले शारदा सिन्हाको स्मरण गर्दै उनको अद्वितीय योगदानलाई भावपूर्ण श्रद्धाञ्जली अर्पण गरेका थिए ।
सभामा देवानगंज गाउँपालिका वडा नम्बर २ का अध्यक्ष एवम् कार्यक्रमका प्रमुख अतिथि जगनारायण मेहताले गायिका सिन्हाले सांस्कृतिक रीतिरिवाजलाई गीतको माध्यमबाट सुन्दर जीवन दिएको भन्दै स्मरण गरे ।
उनले भने, “शारदा सिन्हाले हाम्रो विवाह संस्कारहरूलाई लोकगीतको माध्यमबाट सुन्दर जीवन दिइरहनुभएको छ। उहाँले सांस्कृतिक रीतिरिवाजलाई गीतको माध्यमबाट जिउँदो राख्न महत्वपूर्ण भूमिका खेल्नुभएकाे छ।”
यस्तै, कार्यक्रममा वक्ता भीममनन्दन शर्मा, रामसुन्दर मेहता, लक्ष्मण मेहता, मनमोहन यादव, विद्यानन्द मेहता, र राजु मेहताले पनि गायिका सिन्हाको योगदानको विषयमा बोले ।
उनीहरूले सिन्हाले लोकसंगीतको माध्यमबाट मैथिली र भोजपुरी संस्कृतिलाई उजागर गर्दै सांस्कृतिक धरोहरलाई जगेर्ना गर्न महत्वपूर्ण भूमिका निर्वाह गरेको उल्लेख गरे ।
कार्यक्रमको समापन गर्दै पत्रकार अरविन्द मेहताले भने, “शारदा सिन्हा केवल एक लोकगायिका मात्र नभएर गीतसंगीतको देवी हुनुहुन्थ्यो। उहाँले लोकगीतलाई उच्च स्थानमा पुर्याउँदै हामी सबैको सांस्कृतिक धरोहरलाई समृद्ध बनाउन प्रेरणा दिनुभयो ।”
गायिका शारदा सिन्हाको गीतहरूले मिथिला समाजको विभिन्न संस्कार र सांस्कृतिक विविधतालाई अमर बनाउँदै जनतामा आत्मीयता जगाएका छन् ।
उनले मैथिली र भोजपुरी लोकसंगीतलाई अन्तर्राष्ट्रिय मञ्चमा पुर्याउँदै नेपाल र भारतको साझा सांस्कृतिक सम्पदामा महत्वपूर्ण योगदान पुर्याएकी छन् ।
उनका प्रसिद्ध गीतहरू विवाह, पर्ब, तथा धार्मिक अनुष्ठानमा आज पनि उत्तिकै सजीव रूपमा गाइन्छन्, जसले गर्दा उनलाई “लोकसंगीतको देवी” को रूपमा चिनिन्छ ।
मैथिली र भोजपुरी भाषामा आफ्ना लोकगीतहरूको माध्यमबाट समाजको मन जित्न सफल गायिका थिइन् ।
उनको योगदानलाई सम्मान गर्दै भारत सरकारले उनलाई ‘पद्म श्री’ र ‘पद्म भूषण’ जस्ता प्रतिष्ठित पुरस्कारहरूबाट सम्मानित गरेको थियाे ।
शारदा सिन्हाले लोकसंगीतको क्षेत्रमा नयाँ आयामहरू थप्दै मैथिली र भोजपुरी लोकगीतलाई राष्ट्रिय तथा अन्तर्राष्ट्रिय स्तरमा पुर्याएकी छन् ।
