विराटनगर । मोरङको रंगेली नगरपालिका-३ स्थित बाबुसाहेब टोलीका सन्थाल समुदायले यसपालिको चाडपर्व छाप्रोमुनि नै बसेर बिताउनुपरेको छ ।
गत वर्षको चैत ४ गते भएको भीषण आगलागीमा परेर घर गुएका उनीहरूले दसैं, तिहार र छठ पर्वमा पनि छाप्रोमुनि नै बस्नुपरेको हो ।
सरकारले बजेट नपठाउँदा बाबुसाहेब टोलका अग्निपीडित २२ घरपरिवार अझै छाप्रो मुनि बसिरहेका हुन् । संघीय र प्रदेश सरकारले सुनिश्चित गरेको बजेट नपठाएका कारण उनीहरूले दुःखका साथ दैनिकी चलाइरहनु परेको छ ।
अग्निपीडित जंगली मुर्मुले घरमा बसेजस्तो नभएको बताउँदै दुःखले जीवनयापन चलिरहेको सुनाए ।
घर जलेपछि अविरल वर्षा र हावाहुरीसमेत खुला आकाशमुनि बसेर सामन गरेका आगलागी पीडितहरूले आवास निर्माणमा सहयोगका लागि अपिल गरेका थिए ।
जसअनुरूप, कुल पाँच लाखमा निर्माण हुने घरका लागि पूर्वशर्तअनुसार कोशी प्रदेश सरकारले २५ प्रतिशत खर्च ब्यहोर्ने सहमति भएको थियो ।
यस्तै, संघीय सरकारले ५० प्रतिशत र स्थानीय सरकारले २५ प्रतिशत खर्च ब्यहोर्ने सहमतिअनुसार काम सुरु भएको थियो ।
तर, कार्यविधिको अभाव देखाउँदै संघीय र प्रदेश सरकारले बजेट निकासा नगरेपछि रंगेली नगरपालिकालाई स्रोत जुटाउन थप चार महिना लागेको छ ।
जसले गर्दा समयमा घर हस्तान्तरण गर्न नसकेको रंगेली-३ का वडाध्यक्ष भरतकुमार प्रसाईंले बताए ।
स्रोत सुनिश्चित भएको भए असारअघि नै अग्निपीडितलाई नयाँ घरमा सारिसक्ने भए पनि संघ र प्रदेश सरकारबाट धोका भएको वडाध्यक्षको गुनासो छ ।
हाल घर निर्माणका लागि ह्याविटास र लुथरन वल्र्ड फेडेरेसनले सहयोग गरिरहेका छन् ।
नगरले प्रति घर ५० हजार, ह्याविटासले प्रतिघर १ लाख ५० हजार, संघीय सांसदको जनता आवास कार्यक्रमबाट जस्तापाता र नगरको विपद् कोषबाट केही रकम व्यवस्थापन गर्ने गरी घर निर्माण सुरु भएको छ ।
९० प्रतिशत काम सकिएको छ । शीत लहरभन्दा अघि नै अग्निपीडितलाई नयाँ घरमा सार्ने गरी काम भइरहेको वडाध्यक्ष प्रसाईंको भनाइ छ ।
यस्तै, नेकपा एमाले रंगेली नगर समितिले घर निर्माणका लागि तीन लाख ६५ हजार ३ सय ४० रुपैयाँ आर्थिक सहयोग गरेको थियो ।
नगरपालिकाले बस्ती पुनर्निर्माणका लागि सर्वसाधारणसँग क्युआर कोडबाट गरेको सहयोग आह्वानमार्फत ६ लाख १५ हजार रुपैयाँ नगद संकलन भएको थियो ।
