विराटनगर । सुनसरीको धरानका मेयर हर्क साम्पाङले गैरकानुनी रूपमा वडा नम्बर ११ का वडाध्यक्षलाई लोकेन्द्रकुमार फागोलाई दिएको कार्यवाहक मेयरको जिम्मेवारी कार्यान्वयनमा उच्च अदालतले रोक लगाएको छ ।
धरानका उपमेयर आइन्द्र विक्रम बेघाले उच्च अदालत विराटनगरमा दायर गरेको रिटमा सुनुवाइ गर्दै उच्च अदालत विराटनगर अल्पकालिन अन्तरिम आदेश दिएको हो ।
वडाध्यक्षलाई कावा तोकेसँगै कार्तिक ४ गते उपमेयर बेघाले अदालतमा रिट दर्ता गरेका थिए ।
रिटमाथि आइतबार सुनुवाइ गर्दै न्यायाधीस ध्रुवराज नन्दको इजलासले मेयर साम्पाङको निर्णय कायान्वर्यन नगर्न अन्तरिम आदेश दिएको हो ।
मेयर साम्पाङले उपमेयर कार्यकक्षमा रहँदारहँदै नाताले मामाससुरा पर्ने वडाध्यक्ष फागोलाई कार्यवाहक मेयरको जिम्मेवारी दिएर बेलायत गएका थिए ।
सो प्रकरणमा उच्चले विपक्षीलाई कारण देखाउ आदेशसमेत जारी गरेको छ । मुद्दाको अर्को सुरुवाई कात्तिक ६ गते हुनेछ ।
