सुनसरी । पूर्वमन्त्री भगवती चौधरीको पहलमा सुनसरीको गढी गाउँपालिकामा गरिब, विपन्न र सुकुम्बासी परिवारलाई निःशुल्क घर बनाउने काम अगाडि बढेको छ ।
सुनसरी निर्वाचन क्षेत्र नम्बर ३ की सांसद चौधरीको सक्रियतामा सो क्षेत्रका गरिब, विपन्न, र भूमिहिन नागरिकका हकमा निःशुल्क घर बनाइन लागिएको हो ।
चुची फाउण्डेसनले सो क्षेत्रका गरिब, विपन्न नागरिकका लागि निःशुल्क घर बनाइदिने प्रस्ताव ल्याएकोमा गढी, बर्जु, इनरुवा नगरपालिकाले सैद्धान्तिक सहमति प्रदान गरेका थिए ।
चौधरी महिला, बालबालिका तथा ज्येष्ठ नागरिक मन्त्री हुँदै गर्दा फाउण्डेसनले देशका विभिन्न क्षेत्रमा रहेका गरिब, विपन्नहरूलाई सुरक्षित आवास निर्माणको परियोजना ल्याएको थियो ।
सो क्रममा सुनसरी जिल्लाकै अति पिछडिएको क्षेत्रका रूपमा रहेको बर्जु र गढी गाउँपालिकामा पनि सुरक्षित आवास परियोजना सञ्चालन गर्ने प्रस्ताव अनुरूप सुनसरी ३ नम्बर क्षेत्रभर एक सय घर निर्माणको सम्झौता भएको थियो ।
सम्झौताअनुसार पहिलो चरणमा गढी गाउँपालिकामा ४० घर तथा इनरुवा नगरपालिकाको वडा नं. ७ चाँदवेलामा ३० घर निर्माण गरिने छ ।
बिहीबार परियोजना तत्काल सूचारु गर्न गढी र चाँदवेलामा स्थानीयहरुसँग समेत बृहद् छलफल भएको थियो ।
छलफलमा सांसद चौधरीले आफ्नो चुनाबी बाचा नुसार क्षेत्रको विकासमा गम्भिरतापूर्वक लागेको भन्दै स्थानीयहरूले प्रशंसा पनि गरे ।
सो क्रममा बोल्दै सांसद चौधरीले आफ्नो क्षेत्रको विकास र जनताका लागि आफू सदैव क्रियाशील रहने बताइन् ।
राजनीतिमा लाग्दा आफूले जनताको विकास कसरी हुन्छ भन्नेमा सोच बनाएको उनको भनाइ छ ।
एक वर्षभित्र सुनसरी क्षेत्र नं. ३ का एक सय घर परिवारलाई सुरक्षित आवास निर्माण गर्ने यो परियोजना गढी, बर्जु, इनरुवा ७, इटहरी उपमहानगरपालिकाको सुकुम्बासी क्षेत्र र दुहवी नगरपालिका अन्तरगतका सुकुम्बासी वस्तीमा सञ्चालन हुनेछ ।
